Energetıka mınıstrligi munaı óńdeý zaýyttaryndaǵy eńbek ónimdiligi týraly aıtty

ASTANA. QazAqparat - Búgin QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda energetıka vıtse-mınıstri Bolat Aqsholaqov munaı óńdeý jáne munaı-gaz hımııasy salasynda ónimder óndirisi boıynsha atqarylyp jatqan jumystar týraly baıandady, dep habarlaıdy QazAqparat primeminister.kz saıtyna silteme jasap.

Energetıka mınıstrliginiń derekterine sáıkes, 2018 jyldyń І jartyjyldyǵynyń qorytyndysy boıynsha munaı óńdeý salasyndaǵy eńbek ónimdiligi $89,6 myń/adamdy, 2017 jyldyń sáıkes kezeńimen salystyrǵanda naqty ósim 114,2% qurady. Eńbek ónimdiligi otandyq munaı óńdeý zaýyttarynyń (Atyraý MÓZ, Pavlodar MHZ, Shymkent MÓZ jáne «Kaspıı Bıtým» JShS) negizgi munaı ónimderin óndirýi esebinen ulǵaıtyldy.

«2018 jyldyń alty aıynda 1713,6 myń tonna avtobenzın, 119,1 myń tonna avıakerosın, 2093 myń tonna dızel otyny jáne 375 myń tonna bıtým óndirildi. 2018 jyly 3,9 mln tonna avtobenzın (2017 jylǵa 130,9%), 389 myń tonna avıakerosın (2017 jylǵa 128,4%), 4,4 mln tonna dızel otyny (2017 jylǵa 110,2%), 2,59 mln tonna mazýt (2017 jylǵa 78,96%) jáne 823 myń tonna bıtým (2017 jylǵa 112,6%) óndirisi kútilýde», - dedi B. Aqsholaqov.

Bıylǵy jyldyń birinshi jartyjyldyǵynyń qorytyndysy boıynsha munaı-gaz hımııasy salasyndaǵy eńbek ónimdiligi $8,2 myń/adamdy, 2017 jyldyń sáıkes kezeńine naqty ósim 109,7% qurady. Energetıka vıtse-mınıstriniń aıtýynsha, negizinen eńbek ónimdiliginiń artýy polıpropılen jáne metıl-tret-býtıl efıriniń óndirisin ulǵaıtý esebinen qamtamasyz etilgen.

Jalpy munaı-gaz hımııasy salasynda 2018 jyldyń 6 aıynda 7,6 myń tonna benzol, 16,6 myń tonna polıpropılen, 12,4 myń tonna metıl-tretbýtıldi efır óndirildi.

Osy jyldyń qarasha aıynda paraksılol óndirisi bastaldy. 11,3 myń tonna benzol, 27,3 myń tonna polıpropılen, 18,3 myń tonna metıl-tretbýtıldi efır óndirisi kútilýde.

«Jalpy eńbek ónimdiligi turaqty ulǵaıýda. Osy baǵyttaǵy jumysty odan ári jalǵastyramyz», - dep túıindedi vıtse-mınıstr.