Energetıka mınıstrligi munaı óńdeý kólemin arttyrýdyń kelesi qadamyn atady

NUR-SULTAN. QazAqparat – Qazaqstandaǵy eki munaı óńdeý zaýytyna tehnıkalyq qyzmet kórsetý men qurylǵylardy jóndeý jobasy engiziledi. Jańa júıeniń artyqshylyqtaryn «Ortalyq Azııadaǵy munaı óńdeý men munaı hımııasy» atty halyqaralyq konferentsııada Energetıka vıtse-mınıstri Murat Júrebekov atady, dep habarlaıdy QazAqparat tilshisi.

«Qazaqstan qazirgi tańda munaı óńdeý salasyn damytpasa – bul baǵytta artta qalǵan elge aınalary sózsiz. Minekeı, osy sebepti, elimiz kapıtal tartýda damyǵan elderdiń tájirıbesine súıenip, jeke zańnamalyq bazasyn damytýdy, ınvestorlarǵa tartymdy usynys jasaýdy kózdeıdi. Búkilálemdik Doing Business-2018 bankiniń reıtıngi boıynsha, Qazaqstan 196 eldiń ishinde 28-shi orynda. Biz aldaǵy ýaqytta da Qazaqstannyń geografııalyq turǵydaǵy artyqshylyǵyn paıdalanamyz», - dedi vıtse-mınıstr.

Murat Júrebekovtiń aıtýynsha, Qazaqstan óz ishindegi Atyraý, Shymkent pen Pavlodar MÓZ-derin jańǵyrtýdyń arqasynda jergilikti naryqty 100 paıyzǵa janarmaımen qamtyp otyr.

«Tsıfrlandyrý aıasynda biz jaqyn arada Atyraý men Shymkent munaı óńdeý zaýyttaryna tehnıkalyq qyzmet kórsetý men qurylǵylardy jóndeý jobasyn engizýdi josparlap otyrmyz. Bul júıe profılaktıkalyq tekserister men jóndeý jumystaryn basqaryp, MÓZ-diń úsh jyldyq jóndeýaralyq kezeńine ótýge múmkindik beredi», - dedi ol.

Vıtse-mınıstrdiń aıtýyna qaraǵanda, osy júıeni engizýdiń arqasynda qurylǵylardyń qyzmet etý qyzmeti 8-10 paıyzǵa artyp, jóndeýge ketetin shyǵyn 10 paıyzǵa azaıady, munaı óńdeý kólemi jylyna shamamen 300 myń tonnaǵa artady.