Energetıka mınıstrligi Qazaqstandaǵy benzın tapshylyǵyn túsindirdi
«Biz Qazaqstanda munaı ónimderin tutyný deńgeıiniń edáýir óskenin baıqap otyrmyz. Oǵan elimizdegi kólik sanynynyń artýy yqpal etti. Eger 2001 jyly 1 mln 58 myń jeńil kólik tirkelgen bolsa, 2016 jyly ol 3 mln 924 myńǵa deıin jetken. Soǵan baılanysty Qazaqstanda munaı ónimderin tutyný kólemi 2001 jylmen salystyrǵanda, 3 mln 590 myńnan 8 mln 775 myńǵa deıin, shamamen 2,5 ese ósken», - dedi Maǵaýov Ortalyq kommýnıkatsııalar qyzmetinde ótken baspasóz máslıxatynda.
Sonymen qosa, munaı óńdeý zaýyttary shyǵaratyn benzın kólemi de arttyrylýda. 2001 jyldan beri ol 1 mln 536 myńnan 2 mln 900 myńǵa deıin jetip otyr. ıAǵnı, óndirilgen benzın kólemi eki esege ósken.
«Degenmen bul ósim bizdiń qajettilikterimizdi jaba almaıdy. Biz qazir Reseıden janar-jaǵarmaıdyń 30 paıyzyn jáne dızeldik otynnyń 15 paıyzyn Reseıden satyp alamyz», - dedi vıtse-mınıstr.
Sonymen qatar Energetıka mınıstrligi benzınniń tapshylyǵyna elimizdiń aýmaǵyn tranzıtpen kesip ótetin kólikterdiń úlken suranysy da áser etip jatqandyǵyn tilge tıek etti.
«Eger kórshi eldermen salystyrsaq, Reseıde benzın de, dızel otyny da 190-200 teńge turady. Qyrǵyzstanda lıtri 160 teńgeden saýdalanyp jatyr. Sondyqtan shekaralas aýmaqtyń turǵyndary men tranzıttik kólikter bizden satyp alýdy jón kóredi. Byltyr tipti Qyrǵyzstanǵa munaı ónimderin zańsyz tasymaldaý oqıǵalary da kezikti», - deıdi vıtse-mınıstr.