Energetıka mınıstrligi: Kaspıı qubyryndaǵy aqaý boıynsha dıversııa yqtımaldyǵyn qarastyrmaımyz

NUR-SULTAN. QazAqparat – «Kaspıı qubyr konsortsıýmyndaǵy apat týraly nege Reseı taraby ǵana aqparat taratyp, Qazaqstan taraby rastap qana otyrdy? Bul oqıǵa boıynsha dıversııa yqtımaldyǵyn qarastyrasyzdar ma? Ortalyq kommýnıkatsııalar qyzmetinde ótken brıfıngide QR Energetıka mınıstri Bolat Aqsholaqovqa osyndaı suraq qoıyldy, dep habarlaıdy QazAqparat tilshisi.

«Kaspıı qubyr konsortsıýmy boıynsha dıversııa nusqasyn múlde qarastyrmaımyz. Tehnıkalyq astardan basqa eshteńe kórip turǵan joqpyz. Qoıyp otyrǵan suraǵyńyzdyń oryndy tusy bar. Mundaı nysandar daýyl sııaqty shetin jaǵdaılarǵa daıyn bolýy kerek ekeni ras. Óıtkeni Qara Teńiz mazasyz. Ol jerde port salǵan kezde osynyń bári eskeriledi. «Eskini jamaǵannyń esi ketedi» degen jaqsy sóz bar. 10 jyl boıy 7 baldyq daýyldarǵa tótep berse de, ýaqyt ótke kele tozýy múmkin. Adam da jyldar óte qartaıady. Qondyrǵylar da ýaqyt ótken saıyn jańarmaıdy. Keıde tehnıkalyq bólikte aqaý bolý úshin kishigirim oqıǵa da jetip jatady. Qazir bul týraly aıtý maǵan qıyn. Óıtkeni port ózge eldiń ıýrısdıktsııasynda ornalasqan. Óz sarapshylarymdy, qadaǵalaýshylarymdy ol jaqqa jibere almaımyn», - dedi mınıstr.

Vedomstvo basshysy Kaspıı qubyr konsortsıýmy jekelegen bir memlekettiń menshigindegi kásiporyn emes ekenin eske saldy.

«Port pen onyń aılaqtary Kaspıı qubyr konsotsıýmynyń menshiginde. Ony túrli azamattar basqarady. Arasynda bizdiń azamattar da, Reseıdiń azamattary da bar. Biraq bul kompanııa quramyna kóptegen Batys kompanııalary kiretin konsortsıýmnyń múddesine jumys isteıdi. ıAǵnı, qazaqstandyq jáne reseılik kompanııalarmen birge kóptegen eýrorpalyq, amerıkalyq kompanııalar qatysyp otyr. Sondyqtan, onda jaldanyp jumys isteıtin personal qandaı da bir elge emes, Kaspıı qubyr konsortsıýmyna jumys isteıdi. Qandaı da bir eldiń múdedsine emes, jobanyń múddesine jumys isteıdi. Konsortsıým basshylyǵynyń málimetine senbeýge mende eshqandaı negiz joq.

Birneshe kún boldy tyǵyz baılanystamyz. Degenmen naqty kórinis belgisiz. Óıtkeni keshe daýyl bolǵandyqtan súńgýirler túse almady. Olardyń zertteýi bolǵan joq. Keshe keshke daýyl basylyp, súńgýirler búgin tústi. Endi solardan málimet kútip otyrmyn», - dedi Bolat Aqsholaqov.