Energetıka mınıstrligi energııa óndirýshi uıymdardyń shekti tarıfterin túzetpek
Jalpy 47 energııa óndirýshi uıymnyń 27-si shekti tarıfterdi túzetýge ótinim berdi. 20 energııa óndirýshi uıym úshin tarıf burynǵy deńgeıde saqtalatyn bolady, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.
Ótinimderdi qaraý kezinde QR Energetıka mınıstrligi árbir jaǵdaıda jeke tásildi qoldandy.
Energııa óndirýshi uıymdardy negizgi jáne qosalqy jabdyqtardy, ǵımarattar men qurylystardy aýqymdy jóndeý júrgize otyryp, aldaǵy jylytý maýsymyna daıyndaýmen baılanysty ýaqtyly sheshýdi talap etetin ótinimder nazarǵa alyndy.
Qazirgi ýaqytta Qazaqstannyń energııa óndirýshi uıymdarynyń generatsııalaýshy qýattarynyń tozýy shamamen 58%-dy quraıdy, bul rette birqatar JEO-da tozý deńgeıi 90%-ǵa deıin jaqyndaıdy. Bul Stepnogor JEO – 82%, Rıdder JEO – 75%, Oral JEO – 86%. Jyl saıynǵy tozýdyń ósýi – jóndeý jumystary JEO senimdiligi men qaýipsiz digin qamtamasyz etý úshin qajetti kólemde emes, tek tarıfte kózdelgen kólemde ǵana júrgiziletinine baılanysty.
Jalpy alǵanda, shekti tarıf jobasy aldaǵy kúzgi-qysqy kezeńge daıyndyqty, materıaldar men jabdyqtar qunynyń ósýin, sondaı-aq energııa óndirýshi uıymdarǵa táýelsiz, onyń ishinde otyn men ony tasymaldaý qunynyń artýyna baılanysty shyǵyndardy ulǵaıtýdy kózdeıdi.
Sondaı-aq QR Energetıka mınıstrligi Memleket basshysy Qasym-Jomart Toqaevtyń tapsyrmasy sheńberinde stantsııa qyzmetkerleriniń jalaqysynyń deńgeıin tıisti óńirler boıynsha ortasha deńgeıge deıin arttyrý boıynsha jumys júrgizýde. Shekti tarıf jobasynda óndiristik personaldyń jalaqysynyń ulǵaıýy da eskeriledi. Bul energetıkalyq kásiporyndardan ekonomıkanyń aralas salalaryna joǵary bilikti mamandardyń ketýin toqtatýǵa baǵyttalǵan.
«Sonymen qatar, QR Ulttyq ekonomıka mınıstrliginiń Tabıǵı monopolııalardy retteý komıteti energııa óndirýshi uıymdardyń shekti tarıfterin arttyrýdyń halyqtyń áleýmettik ál-aýqatyna áserine taldaý júrgizip jatqanyn atap ótemiz»,-delingen habarlamada.