Energetıka mınıstrligi: Benzın men dızeldiń aktsızi kóterilse de, shekti baǵa saqtalady

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide QR Energetıka mınıstri Bolat Aqsholaqov benzın men dızeldiń aktsızdik quny ózgerýi múmkin ekenin rastady. Aıtýynsha, bul janarmaıdyń 180 kúndik shekti baǵasyna áser etpeıdi, dep habarlaıdy QazAqparat tilshisi.

«Men brıfıngtiń basynda benzınniń búkil markasyna jáne dızel otynyna naqty baǵa belgilegenimizdi aıttym. Sáıkesinshe, aktsızder qymbattaǵannyń ózinde ol osy belgilengen baǵanyń ishinde bolýy kerek dep usynyp otyrmyz. ıAǵnı, aktsızdiń qymbattaýy janarmaıdyń bólshek saýdadaǵy aqyrǵy baǵasyn qymbattatpaýy kerek. Bul janarmaı naryǵyndaǵy oıynshylardyń marjasyn qataı qaraý esebinen júredi. Qazir biz osy erejeler boıynsha jumys júrgizip jatyrmyz. Mejeli 180 kúnniń ishinde naryqtyń jumysy boıynsha usynys berýimiz kerek»,- dep túsindirdi vedomstvo basshysy.

Onyń sózine qaraǵanda, atalmysh jumystyń ishinde naryqtan tıimsiz deldardardy shyǵarý tetikteri de bar.

«Aktsızdiń qunyn kóterýge múmkindik bar ma degenge kelsek, bar, árıne. Biraq bólshek saýdadaǵy janarmaı baǵasyn qaıta qaraǵaly jatqan joqpyz.

Buǵan deıin de talaı aıtqanmyn, biz baǵany retteý isinde ıeliginde janarmaı quıý stansasy, munaı bazasy sııaqty ınfraqurylymy joq deldaldardy naryqtan shyǵaramyz. Osynyń arqasynda qalǵan oıynshylardyń bárinde marja bolady. Shekti baǵa ózgermeıdi. Deldaldyqpen aqsha taýyp júrgen adamdar ketedi de, baǵany qazirgideı shektegenniń ózinde tabys artylady. Mine osy artylǵan aqsha janarmaı quıý stansalary men munaı bazasy bar óńirlik operatorlardyń, sol munaı ónimderin taratyp otyrǵan shıkizat ıeleriniń arasynda bóliske túsedi», - dedi mınıstr.