Energetıka mınıstrligi Aı-92 markaly benzın baǵasyn 236 teńgege deıin ósirýdi usyndy

NUR-SULTAN. QazAqparat – Energetıka mınıstrligi munaı ónimderiniń shekti baǵasyna memlekettik retteý tártibin ózgertýdi usynyp otyr, dep habarlaıdy QazAqparat.

Bul týraly buıryq jobasy Ashyq NQA saıtynda jarııalandy.

Jarııalanǵan buıryq jobasyna sáıkes, baǵalaryna memlekettik retteý belgilengen bólshek saýdada ótkiziletin munaı ónimderine qosymsha qun salyǵy esebimen shekti baǵalar mynadaı mólsherde belgilengen:

1) Aı-80 markaly benzın – 1 lıtr úshin 89 teńge;

2) Aı-92, Aı – 93 markaly benzın:

Qostanaı, Soltústik Qazaqstan oblystarynda – 1 lıtr úshin 187 teńge;

Nur-Sultan, Almaty, Shymkent qalalarynda, Aqmola, Aqtóbe, Shyǵys Qazaqstan, Batys Qazaqstan, Almaty, Atyraý, Jambyl, Qaraǵandy, Qyzylorda, Pavlodar, Túrkistan, Mańǵystaý oblystarynda, sondaı-aq Abaı, Jetisý, Ulytaý oblystarynda – 1 lıtr úshin 182 teńge.».

3) dızel otyny (jazǵy, maýsymaralyq):

Aqmola, Aqtóbe, Shyǵys Qazaqstan, Batys Qazaqstan, Qostanaı, Soltústik Qazaqstan oblystarynda, sondaı-aq Abaı oblysynda – 1 lıtr úshin 260 teńge;

Nur-Sultan, Almaty, Shymkent qalalarynda, Almaty, Atyraý, Jambyl, Qaraǵandy, Qyzylorda, Pavlodar, Túrkistan, Mańǵystaý oblystarynda, sondaı-aq Jetisý, Ulytaý oblystarynda – 1 lıtr úshin 230 teńge.

Alaıda, Energetıka mınıstrligi munaı ónimderin bólshek saýdada ótkizýge shekti baǵa munaı men munaı ónimderiniń álemdik baǵalaryn, Eýropa naryqtaryna deıingi kólik shyǵystaryn, aktsızderdi, operatsııalyq jáne basqa da shyǵystardy eskerip, Aı-92 markaly benzın lıtri– 236 teńge, dızel otyny – 420 teńge ekenin eskertti.

«Aı-92 markaly benzın baǵasynyń 54 teńgege kúrt ósýi halyq arasynda teris áser etýi múmkin ekenin eskere otyryp, 2025 jylǵa deıin (EAEO munaı jáne munaı ónimderiniń ortaq naryqtary jumys isteı bastaǵan merzim) shekti bólshek saýda baǵalaryn (Aı-92 jáne Aı-93 markaly benzın) kezeń-kezeńimen kóterý usynylady» - delingen buıryq jobasynda.