Energetıka mınıstrligi elektr jáne jylý energetıkasy salasyna baqylaýdy kúsheıtpek
«Jylý energetıkasy salasyndaǵy máselelerdi retteý maqsatynda mınıstrlik «Jylý energetıkasy týraly» jeke salalyq zań ázirledi. Zań jobasynda Kásipkerlik kodeksten elektr jáne jylý energetıkasy salasyndaǵy baqylaý júrgizý tártibin alyp tastaý arqyly baqylaý fýnktsııalaryn kúsheıtý boıynsha normalar kózdelgen. Sondaı-aq, jylý jelilerindegi baqylaý fýnktsııalary jergilikti atqarýshy organdardan Atomdyq jáne energetıkalyq qadaǵalaý men baqylaý komıtetine aýysady. Budan basqa, eldi mekenderdiń sheber-josparlaryn ázirleý, energııa tıimdiligin arttyrýdy yntalandyrý, taza tehnologııalardy qoldaný arqyly josparlaý tetikterin jetildirý esebinen salany reformalaý josparlanyp otyr», - dedi mınıstr.
Onyń aıtýynsha, energetıkanyń tsıfrlyq platformasyn qurý jolymen búkil salany monıtorıngteý jáne baqylaý normalary kózdelgen. Ol qajetti sharalardy ázirleý maqsatynda shoǵyrlandyrylǵan aqparat jınaýǵa jáne salany taldaýǵa múmkindik beredi. Bul rette, osy joba tarıftik retteýdiń naqty jáne tolyq qaǵıdattaryn jáne ólshemsharttaryn belgileıdi. Al jylý energııasyna retteletin tarıfter, atap aıtqanda, tarıftik ádisnamany jetildirý, ekonomıkalyq negizdelgen tarıfti qamtamasyz etý, ınvestıtsııalar tartý múmkindigi soǵan sáıkes kelýi tıis.
«Jylý energııasyna tarıfterdi ekonomıkalyq negizdelgen deńgeıge keltirý jáne halyq arasynda áleýmettik shıelenisti boldyrmaý maqsatynda halyqtyń osal toptaryn tikeleı bıýdjettik qoldaý tetigi qarastyrylady. Sonymen qatar, jańa stantsııalar salý boıynsha ınvestıtsııalyq jobalardy iske asyrý úshin strategııalyq ınvestordy aıqyndaý tetigi kózdelgen. Energııany kóp qajet etetin iri ónerkásiptik jobalardy qoldaý úshin zań jobasynda ınvestıtsııalyq tarıfti qoldaný kózdelgen», - dedi Almasadam Sátqalıev.
Mınıstrdiń sózine qaraǵanda, biryńǵaı satyp alýshy jáne elektr energııasynyń teńgerimdeýshi naryǵy tetigin odan ári jetildirý maqsatynda generatsııany basym irikteýdi qaıta qaraý boıynsha túzetýler kózdelgen.
«Sondaı-aq, zań jobasynda Jylý energetıkasy salasyndaǵy saıasat boıynsha quzyretter men jaýapkershilikti qaıta bólý kózdeledi. Energetıka mınıstrligine jylý energııasyn óndirý jáne tasymaldaý salasyndaǵy basshylyq fýnktsııasy beriletin bolady», - dedi ol.
Osyǵan deıin Úkimet basshysy energııa kózderiniń jetispeýi iri kásiporyndar úshin úlken problemaǵa aınalýy múmkin ekenin aıtty.