Energetıka mınıstri Jańaózen turǵyndarymen kezdesti

AQTAÝ QazAqparat - Mańǵystaý oblysyna jumys sapary barysynda Nurlan Noǵaev Jańaózen qalasynyń turǵyndarymen kezdesip, suraqtaryna jaýap berdi, dep habarlaıdy QazAqparat vedomstvonyń baspasóz qyzmetine silteme jasap.

Turǵyndardy basqa da máselelermen birge óńirdi suıytylǵan munaı gazymen qamtamasyz etý máselesi qyzyqtyrdy.

Jańaózen qalasynda tabıǵı, ilespe munaı gazyn jáne gaz kondensatyn qaıta óńdeıtin gaz óńdeý zaýyty (GÓZ) jumys jasaıdy. Zaýytta taýarlyq (qurǵaq), suıytylǵan munaı gazy, peshke arnalǵan turmystyq otyn, sonymen qatar kómirsýtekti eritkish óndiriledi.

Mınıstr atap ótkendeı, QazGÓZ-de shyǵarylatyn suıytylǵan munaı gazynyń barlyq kólemi (aıyna shamamen 15 myń tonna) tolyǵymen Mańǵystaý oblysynyń ishki naryǵyn qamtamasyz etip otyr, sondaı-aq Mınıstrlik suıytylǵan munaı gazynyń tapshylyǵyn boldyrmaý maqsatynda aı saıyn basqa zaýyttardan qosymsha 3000 tonna bólip otyr.

Mınıstrlik oblys ákimdigi suratqan kólemdi tolyq bólip otyr, al ákimdik osy kólemdi keıinnen gaz jelisi uıymdary arasynda bóledi.

«Suıytylǵan munaı gazy aınalasyndaǵy jaǵdaı barlyq ýákiletti organdardyń baqylaýynda, gaz ákimdikterdiń ótinimderine sáıkes tıep-jóneltiledi, - dep atap ótti Nurlan Noǵaev. – Tótenshe jaǵdaı kezindegi baǵa belgileý máselesine toqtalsam, elimizdiń basshylyǵy men úkimettiń tapsyrmalaryna sáıkes Energetıka jáne Ulttyq ekonomıka mınıstrlikteri avtogaz quıý stantsııalaryndaǵy avtokólikke arnalǵan suıytylǵan munaı gazyna bólshek saýdadaǵy shekti baǵalardy bekitti. Kóterme saýdadaǵy baǵalar 1 tonnasy úshin 38 701 tg. bolyp belgilendi, sonymen qatar aldaǵy ýaqytta bul baǵany kóterý josparymyzda joq».

Elektrondyq saýda alańdary arqyly jetkizý úshin qajetti suıytylǵan munaı gazynyń úlesi ishki naryqqa jetkizý josparyna sáıkes tıisti aıǵa 2019 j. aqpan-maýsym aralyǵynda 5%, 2019 jyly shilde-qyrkúıek aralyǵynda – 10%, 2019 jyly qazan aıynda – 15%, bıyl qańtar-aqpan aılarynda – 20% jáne naýryz aıynan bastap - 25% qurady.

«Gaz jáne gazben jabdyqtaý týraly» zańyna sáıkes baǵasy memlekettik retteý arqyly júrgiziletin toptyq rezervýarlyq qondyrǵylar jáne munaı-gaz-hımııa kásiporyndary arqyly jetkiziletin turmystyq tutynýshylarǵa arnalǵan suıytylǵan munaı gazynyń kólemin qospaǵanda, jetkizý jospary boıynsha suıytylǵan munaı gazynyń barlyq kólemin elektrondyq saýda alańdaryna kóshirý qajet.

Suıytylǵan munaı gazynyń barlyq kólemin elektrondyq saýda alańynda satýǵa tolyq kóshirý kezeń-kezeńmen iske asyrylady, bul baǵany sońǵy tutynýshy úshin birtindep jáne aýyrtpalyqsyz qaıta retteýge múmkindik beredi»,- dep atap ótti Nurlan Noǵaev.