Energetıka mınıstri suıytylǵan gazdy el aýmaǵynan shyǵarýǵa tyıym salýdy usynady

ASTANA. QazAqparat - Energetıka mınıstrligi suıytylǵan gazdy el aýmaǵynan shyǵarýǵa tyıym salýdy usynady. Bul týraly búgin Parlament Májilisiniń Ekologııa jáne tabıǵatty paıdalaný komıtetiniń keńeıtilgen otyrysynda málim boldy.

Energetıka mınıstri Vladımır Shkolnıktiń aıtýynsha, qazir qazaqstandyq naryqta suıytylǵan munaı gazyn jetkizý tetiginde birqatar problemalar oryn alǵan. «Jelilik gaz taratý kompanııalaryna, uıymdarǵa áleýmettik gazdan basqa, suıytylǵan gazdyń eksportyna ruqsat berilgen bolatyn. Alaıda, bizdiń elimizden kommertsııalyq álde áleýmettik gazdyń qaısysy eksporttalyp jatqanyn naqty qadaǵalaý múmkin bolmaı otyr. Zań boıynsha jelilik uıymdardyń suıytylǵan munaı gazyn kóterme saýdamen eksporttaýǵa ruqsat berilgen. Eger ony satyp alýshynyń avtoquıý beketteri bolsa, satyp alý-satý úderisinde onyń alǵan gazy qaıta rásimdeledi. Sóıtip, áleýmettik gaz eksportqa shyǵyp jatyr», - deıdi mınıstr.

Osyǵan oraı, Energetıka mınıstri suıytylǵan munaı gazyn elden tysqary shýǵarýǵa tyıym salýdy usynady. Budan bólek, mınıstr qoldanystaǵy zań talaptaryn saqtamaı, ony óreskel buzýshylardy qatań jazalaý kerektigin aıtyp, bul rette olardy ákimshilik jaýapkershilikke tartý úshin zań normalaryna arnaıy ózgerister engizýdi usynady.