Energetıka mınıstri ońtústiktegi kómir tapshylyǵynyń sebebin túsindirdi

ASTANA. QazAqparat - Kómirdi shetelge satýdan tapshylyq oryn alýda degen aqparat jalǵan. Bul týraly búgin Úkimettiń selektorlyq rejimdegi otyrysynan keıin BAQ ókilderiniń saýalyna jaýap bergen QR Energetıka mınıstri Qanat Bozymbaev aıtty, dep habarlaıdy QazAqparat.

«Temirjol tarapynan eshqandaı problema joq, vagondar bar. Kómir óńdeıtin kásipordarda da esh problema bolǵan emes, shekteý joq. Olar qansha kómir kerek bolsa, sony alady, qajet bolsa óńdeıdi. Al ol úshin tıisinshe tapsyrys qajet. Almaty qalasynyń jáne Almaty oblysynyń jergilikti kompanııalary kelisimshartqa otyryp, aqshasyn tólese, kómir qansha kerek bolsa sonsha tasymaldanady», - dedi mınıstr Almaty qalasy men Almaty oblysyndaǵy kómir tapshylyǵyna qatysty.

Qanat Bozymbaev jergilikti organdar bul máseleni qatań baqylaýda ustaý qajettigin aıta kele problemany óńir ákimderimen ótken aptada da, osy aptada da talqylaǵanyn atap ótti.

Sonymen qatar mınıstrden BAQ ókilderi kómir shetelge satylýyna baılanysty elimizde tapshylyq týyndady degen aqparat qanshalyqty ras ekendigin surady.

«Joq, ol jalǵan aqparat. Kómir tek qana 2 razrezden satylady. Turmystyq kómir basqa razrezden óndiriledi, sapasy sál basqasha», - dep jaýap berdi ol.