Energetıka mınıstri elektr stantsııalaryn jóndeý merzimderin oryndamaǵan óńirlerdi atady
«Qazaqstannyń birtutas elektr energetıkalyq júıesiniń turaqty jumys isteýi maqsatynda energetıkalyq kásiporyndardy kúzgi-qysqy kezeńdegi jumysqa daıyndaý jalǵasyp keledi. Júıelik operator bekitken grafıkke sáıkes, elektr stantsııalarynda 4 energoblokta, 25 qazandyqta, 23 týrbınada jóndeý aıaqtaldy. Al 4 energoblokta, 27 qazandyq pen 16 týrbınada jóndeý jumystary ártúrli satylarda», - dedi B. Aqsholaqov.
Jergilikti atqarýshy organdardyń aqparaty boıynsha jylý berý kezeńine ortalyqtandyrylǵan jylýmen jabdyqtaý baǵytynda 487 qazandyqty daıyndaý úshin 1 073 nysanǵa jóndeý júrgizildi. Bul turǵyda jospardaǵy nysandardyń 90 paıyzy qamtyldy.
«Elektr jelileri boıynsha jalpy uzyndyǵy 20 201 km elektr energııasyn taratý jelilerin, sondaı-aq 712 joǵary voltty kishi stantsııalardy jóndeý josparlanǵan bolatyn. Búgingi tańda 14 047 km elektr energııasyn taratý jelileri men 331 kishi stantsııa jóndeldi. Bul jyldyq jospar aıasynda jeliler boıynsha tıisinshe 70 paıyzdy jáne kishi stantsııalarǵa qatysty 46 paıyzdy qurady. Elektr energııasy jelilerin jóndeý bekitilgen kestege sáıkes aıaqtalyp keledi», - dedi mınıstr.
Onyń aıtýynsha, Qaraǵandy, Shyǵys Qazaqstan oblystaryndaǵy elektr stantsııalarynyń negizgi jabdyqtaryn jóndeý merzimderi saqtalmaǵan.
Budan basqa, Qaraǵandy, Mańǵystaý oblystarynda jáne Shymkent qalasynda kúrdeli jóndeý jqmystary 2023 jylǵa aýystyryldy.
«Atomdyq jáne energetıkalyq qadaǵalaý men baqylaý komıteti oblystardyń ákimdikterimen birlesip, energııa kásiporyndarynyń aldaǵy kúzgi-qysqy kezeńge daıyndyǵyna turaqty baqylaýdy júzege asyrady. Osy oraıda elektr stantsııalaryndaǵy jóndeý jumystaryn ýaqtyly aıaqtaý jóninde sharalar qabyldaıtyn bolady», - dedi vedomstvo basshysy.