Energetıka mınıstri Aqmola oblysyndaǵy gaz jáne jylý berý júıesine qatysty pikir bildirdi
«Energetıka mınıstrligi óndirýshi zaýyttardyń shyǵyndaryn ishinara óteý maqsatynda shekti kóterme baǵany tonnasyna 33 600 teńge deńgeıinde bekitý týraly sheshim qabyldady. Bul shara suıytylǵan munaı gazyn óndirýshileri men ótkizýshileri arasynda kiristerdiń ádil bólinýin qamtamasyz etýge, sondaı-aq suıytylǵan munaı gazyn óndirý zaýyttaryn yntalandyrýǵa múmkindik beredi. Sonymen qatar, Básekelestikti qorǵaý jáne damytý agenttigi baǵalardy memlekettik retteýdi saqtap qaldy. Aqmola oblysy úshin suıytylǵan gazdyń bıyldyń sońyna deıingi merzimde 1 lıtr úshin 70 teńge mólsherinde shekti bólshek saýda baǵasyn bekitti», - dedi B. Aqsholaqov.
Mınıstrdiń aıtýynsha, osy óńirde 26 gaz jelisi uıymy jáne 120-ǵa jýyq avtomobılge gaz quıý stantsııasy bar.
«2021 jyly oblysta suıytylǵan munaı gazyn tutyný 98,6 myń tonnany qurady. Bıyldy qańtar-tamyz aılarynda shamamen 68 myń tonna ótkizildi. Mınıstrlik uzaq merzimdi baǵa turaqtylyǵyn qamtamasyz ete otyryp jáne baǵalardyń alypsatarlyq ósip ketýine jol bermeı, suıytylǵan munaı gazyn oblystar boıynsha bólý tetiginiń reınjınırıngin júrgizý boıynsha sharalar qabyldap jatqanyn atap ótkim keledi. Osy oraıda óndirýshiler belgilegen bólshek saýda baǵalaryna súıene otyryp, suıytylǵan munaı gazyna shekti kóterme baǵalardy aıqyndaý jónindegi qaǵıdalar ázirlenetin bolady. Sonymen qatar, Prezıdenttiń tapsyrmasyna sáıkes suıytylǵan munaı gazynyń bırjasyna kóshý 2023 jylǵy 1 qańtarǵa aýystyryldy», - dedi vedomstvo basshysy.
Budan bólek ol Aqmola oblysynda jylý júıesimen qamtamasyz etýdiń negizgi kózi Stepnogor jylý energetıkalyq ortalyǵy jáne «Kókshetaý Jylý» MKK qazandyqtary ekenin aıta kele, olardyń belgilengen jıyntyq qýaty 1,6 myń Gkal/saǵ, al qazirgi qýaty 1,1 myń Gkal/saǵ shamasynda ekenin aıtty.
«Stepnogor jylý energetıkalyq ortalyǵynyń ortasha tozýy 76 paıyzdy, al «Kókshetaý Jylý» memlekettik kommýnaldyq kásiporyny qazandyq jabdyǵynyń ortasha tozýy 63,1 paıyzdy qurap otyr. Búginde qala qarqyndy damyp keledi, turǵyn úı qurylysy qarqyndy júrgizilýde, kóp qabatty qurylystary bar jańa kvartaldar, kásiporyndar men áleýmettik sala nysandary iske qosylyp jatyr. Osyǵan turǵyda Kókshetaý qalasyn jylýmen jabdyqtaýǵa qatysty máselesi ózekti. Jumys istep turǵan aýdandyq qazandyqtardyń qýaty jetkiliksiz.
Ol úshin jylý qýaty 520 Gkal/saǵ quraıtyn Kókshetaý jylý energetıkalyq ortalyǵyn salý qarastyrylyp jatyr», - dedi mınıstr.
Budan buryn habarlanǵadaı, QR Energetıka mınıstrligi «Kókshetaý qalasynda JEO salý» jobasy boıynsha tender ótkizedi.