Energetıka mınıstri Sarandaǵy qazandyqtyń iske qosylmaýynyń sebepterin atady

<p>QARAǴANDY. KAZINFORM - Energetıka mınıstri Almasadam Sátqalıev jergilikti qazandyqtardyń, ortalyq qazandyqtyń, sondaı-aq Saran qalasynyń jylý jelileri men áleýmettik nysandarynyń jaǵdaıyn tekserdi. Sondaı-aq, mınıstr jedel shtab otyrysyn ótkizdi.</p>

Saran qalasyndaǵy jylý jaǵdaıyna baılanysty Energetıka mınıstri bastaǵan komıssııa quryldy. Komıssııa quramyna energııa qadaǵalaý salasynyń jáne tıisti organdardyń ókilderi kirdi. 

«Úkimet komıssııasy, energetıka mınıstrligi, atom energetıkasyn qadaǵalaý komıteti basshylyǵy, jergilikti atqarýshy organdardyń ókilderi Saran qalasynyń barlyq mańyzdy jylýmen jabdyqtaý nysandaryn aralap shyqty. Barlyq negizgi qazandyqtardy aralap, jylý jelilerin qalpyna keltirý jumystarynyń barysymen tanysty. Jumystar bekitilgen kestege sáıkes júrgizilýde. Jylýmen jabdyqtaýdyń rezervtik shemasy iske qosyldy. Premer-Mınıstr belgilegen merzimder mınıstrliktiń baqylaýynda», — dedi Almasadam Sátqalıev.

Qazirgi ýaqytta mamandar toby jańa qazandyqtyń apattyq rejımin qosý sebepterin anyqtaýda. Komıssııa nysandy iske qosý kezinde qandaı problema bolǵanyn egjeı-tegjeıli zertteıtin bolady. 

«Nysan ýaqtyly paıdalanýǵa berilmedi. Osyǵan baılanysty, ákimdik jylýmen jabdyqtaýdyń rezervtik shemasyn jedel iske qosyp, shaǵyn qazandyqtardyń jumysy qaıta qalpyna keltirilýde. Jylý jelilerine qosý jumystary júrip jatyr. Keıbir nysandarda qazirgi ýaqytta jylý bar. Túnge deıin bul jumysty belgilengen rejımderge sáıkes, belgilengen kestelerge sáıkes qosylýyn baqylaýda ustaıtyn bolamyz», — dep tolyqtyrdy energetıka mınıstri.

Merdigerdiń aıtýynsha, nysandy iske qosýǵa kómektesetin mamandar tobyn jumyldyrmaq. Jaqyn arada qosymsha mamandardyń kelýin kútip otyr. Almasadam Sátqalıev jańa jylý kózi iske qosylmaı qalýynyń aldyn ala sebepterin atady. 

«Munda birqatar faktorlardyń jıyntyǵy bar№ Birinshisi — avtomatıka rejımi apattyń obektıvti rejımin kórsetýde. Dóńgelek sorǵylardyń jumysynda problema bar, qazandyqtyń jumysynda aqaý bar, tómen qaınaǵan qabattyń jumysyna tikeleı baılanysty problema bar. Biraq máseleni anyqtaıtyn komıssııa ǵana obektıvti qorytyndy jasaı alady. Qazir munyń bári qalpyna keltirilýde, jóndeý brıgadalary jumys isteýde. Biz túpkilikti qorytyndy jasaımyz. Biraq soǵan qaramastan iske qosý-baptaý jumystary jalǵasatyn bolady. Stantsııa jumys isteıdi. Olar tek birinshi ǵana emes, ekinshi qazandyqty da iske qosýdy josparlap otyr», — deıdi Almasadam Sátqalıev.

Turǵyndardyń kópshiliginde jergilikti qazandyqtardyń qýattylyǵyna qatysty suraqtar men alańdaýshylyqty seıilti maqsatynda barlyq shaǵyn qazandyqtar tekserildi. 

«Qazandyqtarǵa arnaıy bardyq. Bólshektelgen qazandyqtar boldy. Qazir olar jumysyn qalpyna keltirýde. Ázirge temperatýra rejımi olarǵa jumys isteýge múmkindik berip otyr. Bir jerde 2, basqa jerde 3 qazandyq, taǵy bir jerde 5 qazandyq jumys ister tur. Qazir bul qazandyqtar ornatylýda. Qosymsha jańa qazandyqtarǵa tapsyrys berildi, ıaǵnı sýyq túskenge deıin ákimdiktiń jumys josparyna sáıkes osy qosymsha qazandyqtar ornatylady», — dep sendirdi Energetıka mınıstri.

Búgin Úkimet otyrysynda premer-mınıstr bul jaǵdaıdyń oryn alýyna jol bergen adamdar jazalanatynyn aıtty. Ázirge bul oqıǵaǵa kim jaýapty bolatyny belgisiz. Energetıka mınıstrligi basshysynyń aıtýynsha, komıssııa jetkilikti túrde egjeı-tegjeıli jumys isteıtin bolady jáne olar barlyq kezeńdi, apattyń barlyq ýaqytyn qadaǵalaıdy. Sondaı-aq, qyzmetkerlerdiń áreketi jáne jylý kóziniń apattyq toqtaýynan buryn qabyldanǵa sheshimder anyqtalady. Qys mezgiline daıyndyq boıynsha jedel shtab jumysynyń hattamalaryn zerdelegennen keıin obektıvti kórinis usynylady, deıdi Almasadam Sátqalıev. 

Esterińizge sala keteıik, Saran qalasynda turǵyndar úılerde jylýdyń joqtyǵyna jappaı shaǵymdana bastaǵan. Qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.