Endi turǵyndar qabyldaýyma elektrondy kezekpen jazylatyn bolady - Almaty ákimi

ALMATY. QazAqparat – Almaty ákimi Baqytjan Saǵyntaevpen kezdesý barysynda múmkindigi shekteýli azamat ákimniń qabyldaýyna kire almaı júrgenin aıtyp shaǵymdandy, dep habarlaıdy QazAqparat tilshisi.

«Ylǵı osyndaı kezdesýlerde adamdar kire almaı jatqanyn aıtyp jıi shaǵymdanady. Shynymdaı aıtsam, kezek qalaı jyljıtynyn bilmeıdi ekenmin. Bul meniń kóńilimdi alańdatady. Biraq men bárin qabyldap tyńdaýǵa ázirmin. Osy oraıda Tsıfrlandyrý basqarmasyna tapsyrma berdim. Endi meniń qabyldaýyma kezek elektrondy júıemen júretin bolady. Adamdar HQKO, bankterdegideı kezegin elektrondy platforma arqyly, ınternet arqyly baqylap otyrady», - dedi ákim.

Qala basshysy ákimdik apparatyna múmkindigi shekteýli azamatty jeke qabyldaýǵa jazýyn tapsyrdy.

Sonymen qatar, onyń aıtýynsha, halyqtyń saýaldary ońtaıly sheshimin tabý úshin I-azamat platformasy qurylady.

Turǵyndardyń jeke aýlasyna qatysty irili-usaqty saýaldaryn tyńdap bolǵan soń ákim qalada arnaıy talqylaý platformasy kerektigin aıtty.

«Turǵyndardyń irili-usaqty saýaldary ortaq mámilege kelý úshin talqylaýdy qajet etedi. Osy maqsatta qalada I-azamat platformasy qurylady. Keıbir usaq saýaldardyń ózi eger júıe ashyq bolmasa, aqparat qoljetimdi bolmasa úlken saýalǵa aınalady. Sol úshin osy platforma ashylady. Onda daýys berý júıesi, talqylaý júıesi bolady», - dedi ákim.