Endi shetelge júk tasymaldaıtyn otandyq júrgizýshilerge ruqsat elektrondyq túrde beriledi

ASTANA. QazAqparat – Qazaqstandyq júk tasymaldaýshylarǵa shet memleketterdiń aýmaǵy arqyly ótý úshin beriletin ruqsat elektrondy formatta usynylady, dep habarlaıdy «QazAqparat»HAA tilshisi.

«2023 jylǵy 1 sáýirden 2024 jylǵy 15 naýryzǵa deıin «QR ratıfıkatsııalaǵan halyqaralyq sharttarǵa sáıkes Qazaqstan Respýblıkasynyń tasymaldaýshylaryna shet memlekettiń aýmaǵy boıynsha jol júrýge ruqsat berý» memlekettik kórsetiletin qyzmet boıynsha pılottyq joba iske asyrylsyn», - delingen «Ashyq» NQA portalynda jarııalanǵan buıyryq jobasynda.

Qujatqa qosymsha berilgen túsindirmede bul qyzmettiń aqyly ekeni jazylǵan.

«Memlekettik qyzmet jeke jáne zańdy tulǵalarǵa aqyly negizde kórsetiledi. Jolaýshylar men júkterdi halyqaralyq qatynasta tasymaldaýdy júzege asyratyn otandyq avtokólik quraldarynyń Qazaqstan Respýblıkasynyń aýmaǵynan shyǵýy úshin alym «Salyq jáne bıýdjetke tólenetin basqa da mindetti tólemder týraly» (Salyq kodeksi) Qazaqstan Respýblıkasynyń 2017 jylǵy 25 jeltoqsandaǵy Kodeksinde belgilengen alym mólsherlemesi boıynsha respýblıkalyq bıýdjetke tólenedi jáne alym tólengen kúnge qoldanystaǵy 1 AEK-ti (3 450 teńge) quraıdy. Alym somasyn tóleý portal arqyly júzege asyrylady», - dep túsindirme berilgen buıyryqqa.

Qytaıǵa barý úshin beriletin «S» nusqasyndaǵy elektrondyq ruqsattar myna kedendik pýnktterde iske asyrylady:

1) Dostyq-avto (Jetisý oblysy);

2) Nur Joly (Jetisý oblysy);

3) Kóljat (Almaty oblysy);

4) Baqty (Abaı oblysy);

5) Maıqapshaǵaı (Shyǵys Qazaqstan oblysy).

Eske sala keteıik, buǵan deıin Premer-Mınıstr jaýpty vedomsvolarǵa Qytaıdan júk tasymaldaýdaǵy kedergilerdi jedel joıýdy tapsyrǵan bolatyn.