«Endi mektepter úshtildi bolady» - baspasózge sholý
***
«Egemen Qazaqstan» basylymynda «Tarazdaǵy tamasha týrnır qazaq kúresiniń abyroıyn asqaqtatty» degen kólemdi maqala basyldy. Ótken senbi kúni «Qazaqstan barysy» qazaq kúresin damytý qory, Dúnıejúzilik qazaq kúresi federatsııasy jáne Jambyl oblysynyń ákimdigi qazaq kúresinen alǵash ret «Eýrazııa barysy» halyqaralyq týrnırin ótkizdi. Sáýleti men dáýleti jarasqan elimizdegi eń kóne shahar - Taraz qalasynda jalaý kótergen jarysqa Mońǵolııa, Túrkııa, Iran, Tájikstan, Polsha, Reseı jáne Qytaı balýandary qatysty. Týrnır óte joǵary deńgeıde ótti. Eń bastysy, ol ata-babalarymyzdan amanat bolyp qalǵan qazaq kúresi dese delebesi qozatyn jankúıerlerdiń kóńilinen shyqty. Týrnır ıdeıasynyń avtory, «Qazaqstan barysy» qazaq kúresin damytý qorynyń tóraǵasy, respýblıkalyq Qazaq kúresi federatsııasynyń prezıdenti Arman Shoraevtyń aıtýynsha, «Samuryq-Qazyna» ulttyq ál-aýqat qory «Eýrazııa barysyn» ótkizýge bas demeýshi bolyp, jarysty ótkizemiz degen kúnnen bastap barlyq jaǵdaıdy jasaǵan.
Sondaı-aq, «Egemen Qazaqstan» gazetiniń jazýynsha, Qazaqstan Parlamenti Májilisiniń Tóraǵasy Nurlan Nyǵmatýlın Aýǵanstan Islam Respýblıkasy Parlamenti Volesı Djırgasynyń vıtse-spıkeri Mohammed Saldjýk bastaǵan aýǵanstandyq parlament delegatsııasyn qabyldady.
Taraptar parlamentaralyq ózara is-qımyl basymdyqtaryn talqylaı kelip, salalyq komıtetter men yntymaqtastyq jónindegi toptar arasyndaǵy baılanys qarqynyn arttyrý ekijaqty qarym-qatynastyń odan ári nyǵaıýyna jol ashatynyn tilge tıek etti. Ásirese, Aýǵanstandaǵy jaǵdaıdy turaqtandyrýǵa basa nazar aýdaryldy.
***
«Ótken jeksenbide aıtyssúıer qaýym Táýelsizdik kúnine arnalǵan respýblıkalyq aqyndar aıtysyna jınaldy. Mádenıet jáne aqparat mınıstrliginiń Mádenıet komıteti jáne «Nur Otan» partııasynyń qoldaýymen ótken «Jyryń bolyp tógilemin, elim» atty aıtysta aqyndar «Altyn dombyra» úshin sóz saıystyrdy. Byltyrǵydan bir ereksheligi, bıyl «Altyn dombyrany» qaraýyl kúzetken joq. Bir jyl boıy ulttyq murajaıda saqtalǵan dombyrany sahnaǵa byltyrǵy jeńimpaz Muhtar Nııazov alyp shyqty. Odan keıin shaı quıatyn qyzdar baǵaly syılyqty sahna syrtyna qaraı alyp ketti. Bıylǵy aıtysqa qatysatyn aıtyskerler arnaıy reıtıngpen iriktelipti»,-dep jazady «Aıqyn» basylymy búgingi sanyndaǵy «Altyn dombyra» - Jandarbekte» degen maqalasynda. www.kazaitys.kz saıty byltyrǵy 9 jeltoqsandaǵy «Bizdiń el osyndaı» atty aıtysynan búginge deıin bir jyl ishinde ótken respýblıkalyq aıtystarda bas júlde alǵan aqyndar arasynda reıtıng túzip, alǵashqy ondyqqa kirgenderin iriktep bergen. Sóıtip, bul aıtysqa Balǵynbek Imashev, Aınur Tursynbaeva, Sara Toqtamysova, Bekarys Shoıbekov, Muhtar Nııazov, Jandarbek Bulǵaqov, Jaqsylyq Orynbasar, Nurmat Mansurov, Dıdar Qamıev, Qanat Myrzahan qatysty. Bul aıtysqa jazýshy, Májilis depýtaty Aldan Smaıyl bastaǵan qazylar tórelik etti.
Sonymen qatar osy basylymda «Endi mektepter úshtildi bolady» degen maqala jarııalandy. Keshe «Úkimet saǵaty» aıasynda parlamentarııler aldynda esep bergen BǴM-nyń jańa basshysy A.Sárinjipov ózi dál osy laýazymǵa turǵannan keıin ǵana balasyna balabaqshadan oryn tabylǵanyn ashyq aıtty. Depýtattar mektepke deıingi tárbıe uıymdaryna «blatsyz» balany turǵyzý qıyndap ketkenin alǵa tartqan bolatyn. Mınıstr elimizde, ásirese, Astanada búldirshinderge arnalǵan álgi mekemelerde oryn jetispeýshiligi máselesiniń «óte ótkir» turǵanyn rastady.
- Meniń ózim ákemin. Biz 3,5 jyl boıy oryn kezeginde turdyq! Biraq shúkirshilik, jaqynda bul máselem sheshildi. Men mınıstr bolyp taǵaıyndala salysymen, bir orynǵa qol jetkizdik, - degen BǴM basshysy: «Meniń bul qyzmetimniń sondaı artyqshylyǵy bar» degen ázildi qosty.
***
«Jas qazaq» gazetiniń sońǵy sanynda «Baspana túıtkili» degen maqala kópshilik nazaryna usynyldy. «Turǵyn úı búgingi kúnniń eń ózekti máselesi ekeni anyq. Muny memleket te moıyndap otyr. Jer aýmaǵy boıynsha álemniń toǵyzynshy memleketi sanalatyn jáne dúnıe júzine munaıly el retinde tanylǵan elimizdiń bar-joǵy 17 mıllıon halqyn tutastaı baspanamen qamtamasyz ete almaýyn sanaly aqyl-oımen túsindirý óte qıyn»,-dep jazady maqala avtory.
Qoljetimdi baspananyń qoljetimsiz bolýynyń negizgi eki sebebi bar:
Birinshi sebep, memlekettiń turǵyn úımen qamtamasyz etý sharalarynyń tıimsizdigi. Ekinshi sebep, turǵyn úı baǵasynyń shamadan tys qymbat bolýy.