Endi elordalyqtar kommýnaldyq kelisimsharttardy onlaın formatta jasaı alady

ASTANA. QazAqparat - Elorda turǵyndary elektrmen, sýmen jáne jylýmen qamtamasyz etý, qoqys shyǵarý jáne lıftterge tehnıkalyq qyzmet kórsetý boıynsha qyzmetterdi kórsetý týraly kelisimdi onlaın jáne proaktıvti formatta jasaı alady, dep habarlaıdy QazAqparat Astana ákimdiginiń resmı saıtyna silteme jasap.

Astanalyqtar tek 1414 nómirinen SMS habarlamaǵa jaýap berip, saýalnamadan ótip, jeke derekterin paıdalanýǵa ruqsat berýi qajet. Al bes mınýttan keıin barlyq qajetti kelisimderdiń jasalǵany týraly habarlama keledi.

Proaktıvti qyzmettiń negizgi mindeti – qyzmet kórsetý úderisin avtomattandyrý, ashyqtyq, qaǵazbastylyqty joıý, sondaı-aq sybaılas jemqorlyq táýekelderi múmkindigin joıý, Qyzmet kórsetýshilermen baılanysqa jol bermeý.

Aıta ketý kerek, sońǵy úsh jylda i-Qala ortalyǵy 80 myńnan astam astanalyqqa barlyǵy 317 myń kommýnaldyq qyzmet kórsetti.