Endi elimizde quqyǵy saqtalmaǵan múmkindigi shekteýli adamdar BUU-ǵa shaǵym túsire alady

ASTANA. QazAqparat – Memleket basshysy Qasym-Jomart Toqaev «Múgedekterdiń quqyqtary týraly konventsııaǵa fakýltatıvtik hattamany ratıfıkatsııalaý týraly» QR Zańyna qol qoıdy, dep habarlaıdy QazAqparat tilshisi.

«Múgedekterdiń quqyqtary týraly konventsııaǵa 2006 jylǵy 13 jeltoqsanda Nıý-Iorkte jasalǵan fakýltatıvtik hattama ratıfıkatsııalansyn», - delingen Prezıdent qol qoıǵan qujattyń mátininde.

Endi zań talabyna saı, atalǵan qujat Birikken ulttar uıymynyń Múmkindigi shekteýli adamdardyń quqyqtary jónindegi komıtetine jiberiledi. Keıin ony uıymnyń keńesi qarap, Qazaqstan tarapynan ótinishterdi qabyldaýǵa ruqsat beredi. Sodan soń óziniń quqyǵy buzyldy dep esepteıtin múmkindigi shekteýli Qazaqstan azamaty BUU-nyń jaýapty komıtetine aryz-shaǵym túsire alady.

Toqtala ketsek, jalpy elimiz «Múgedekterdiń quqyqtary týraly» konventsııaǵa buryn qosylǵan. Degenmen oǵan ilespe fakýltatıvtik hattamany ratıfıkatsııalaǵan joq. Al, hattama maquldanbasa, qazaqstandyqtardyń aryzyn BUU qaramaıdy.