Endi barlyq saıası ınstıtýttardy qaıta iske qosý mindeti tur - Erlan Qarın

NUR-SULTAN. QazAqparat – QR Memlekettik keńesshisi Erlan Qarın Parlamenttiń birlesken otyrysynda qabyldanǵan Konstıtýtsııaǵa engizilgen ózgertýlerge qatysty pikir bildirdi, dep habarlaıdy QazAqparat tilshisi.

«Búgin Parlament qabyldaǵan saıası reformalardyń paketi Qazaqstannyń jańa demokratııalyq modelge kóshkenin bildiredi. Bul modelde Prezıdent bir merzimge qaıta saılaný quqyǵynsyz saılanady (onyń ústine bul norma ózgerissiz qalady jáne qaıta qaraýǵa múmkin bolmaıdy). Sondaı-aq Konstıtýtsııalyq sot sýdıalarynyń ókilet merzimi prezıdenttik jáne parlamenttik ókilet merzimderinen uzaqtaý bolmaq. Bul reformalardyń paketin buryn iske asyrylǵan konstıtýtsııalyq reformamen birge qaraý qajet: jańa Konstıtýtsııalyq sot ınstıtýty quryldy; bir mezgilde Parlamenttiń ókilettigi keńeıip, Prezıdenttiń ókileti qysqartyldy; aralas saılaý júıesi engizilip, partııalardy tirkeý rásimin ońaılady; óńirlerdiń derbestigin kúsheımek», - dep jazdy ol telegram kanalynda.

Onyń paıymynsha, endi saıası ınstıtýttardy qaıta iske qosý qajet. Al ol úshin prezıdenttik jáne parlamenttik saılaýlar ótkizý kerek.

«Munyń bári, túptep kelgende, memlekettik qurylymnyń ınstıtýtsıonaldyq kelbetin bılik tarmaqtarynyń arasynda barynsha teńgerim qalyptastyra otyryp túzedi. Jańa memlekettik model bıliktiń udaıy rotatsııalanýyn, saıası júıeniń boljamdylyǵy men ornyqtylyǵyn qamtamasyz etedi jáne tutastaı alǵanda, memleketimizdiń odan ári damýyn tek demokratııalyq bastaýlarda, saıası básekelestik negizinde baıandy etedi. Basqasha aıtqanda, reformalardyń jańa paketi saıası júıeniń ózgerý protsesin aıaqtaıdy. Endi barlyq negizgi saıası ınstıtýttardy (Prezıdent, Parlament, máslıhattar, Úkimet) qaıta iske qosý mindeti tur. Onyń birinshi kezeńi Joldaýda jarııalanǵan prezıdenttik saılaý bolady», - dedi Memlekettik keńesshi.