Endi aıyppuldy mobıldi balanstaǵy aqshamen tóleýge bolady

NUR-SULTAN. QazAqparat - «Ulttyq aqparattyq tehnologııalar» AQ jáne «Qazpochta» AQ eGov.kz portalynda uıaly telefon balansy arqyly aıyppul, baj salyqtaryn jáne taǵy basqa tólemderdi tóleý servısin iske qosty, dep habarlaıdy QazAqparat «Qazposhta» AQ baspasóz qyzmetine silteme jasap.

Budan bylaı KCell jáne Bılaın mobıldi operatorlarynyń abonentteri aıyppuldy, baj salyǵyn jáne taǵy basqa tólemderdi banktik kartany qoldanbaı-aq, balanstaǵy aqshamen tóleı alady. Ol úshin portaldaǵy belgili bir qyzmetti alý barysynda «Uıaly telefon balansynyń kómegimen tóleý» tásilin tańdaý kerek.

«Óz derekterin jáne uıaly telefon nómirin engizgen kezde abonent bir rettik SMS-parolin rastaǵanda, aıyppuldyń onlaın-tólemi júrgiziletin bolady. Munymen qosa, tólem týraly chek portaldaǵy «jeke kabınette» saqtalady» delingen habarlamada.

Esterińizge sala keteıik, atalǵan jańa tásilden basqa tólem kartasynyń nemese elektrondyq ámııannyń kómegimen de tólem jasaýǵa bolady.