Endigi úmit tek Nurbek Oralbaıda — Myrzaǵalı Aıtjanov
— Myrzaǵalı Qulanuly, búgin Nurbek Oralbaı fınalǵa shyqty. Barsha qazaq eli qýanyp jatyr. Shákirtińizdiń jartylaı fınaldaǵy aıqasy týraly aıtyp berseńiz?
— Bári de múmkin. Bul Olımpıada oıyndary. Ońaı qarsylas joq. Osynda álemdegi eń myqty boksshylar iriktelip keldi. Árbir kezdesý ońaıǵa soqpaıdy. Osyǵan deıin domınıkandyq qarsylasymyzdyń jekpe-jekterin kórdik. Myqty degen boksshylardyń barlyǵyn qoǵadaı japyryp, jartylaı fınalǵa shyqty. Ol qandasymyz Toqtarbekti de jeńdi. Biraq, Nurbek jartylaı fınalda onyń jolyn bógedi.
— Nurbek qandaı taktıkanyń arqasynda jeńiske jetti?
— Biz onyń qarsylasyn jaqsylap zerttedik. Nátıjesinde Nurbekke tapsyrma berdik. Qarsylasyna shabýyldamaı, kerek kezde soqqy jumsap otyrý kerek ekenin aıttyq. Tapsyrmany tolyq oryndap shyqty.
— Bokstan erler arasynda barlyq úmit Nurbek te qaldy. Endi fınalǵa qanshalyqty daıynsyzdar?
— Biz ár jekpe-jekke úlken daıyndyqpen shyǵamyz. Buǵan deıin de, barlyq boksshylarymyz baryn salyp judyryqtasqanyn bilesizder. Alaıda, keıbir boksshylarymyz túsiniksiz jaǵdaıda utylyp qaldy. Kimniń qalaı judyryqtasyp, qalaı jeńilgenin búkil álem kórip otyr. Bizdiń mindet ár boksshyny daıyndap, rıngke shyǵarý. Al baǵany beretin, jeńimpazdyń qolyn kóteretin tóreshi. Sondyqtan, biz basqa jumysqa aralaspaımyz. Óz mindetimizdi ótep jatyrmyz. Fınalǵa da jaqsylap daıyndalamyz. Nurbek fınaldaǵy qarsylasyn ózi de jaqsy biledi. Endi onymen qalaı judyryqtasýda, qandaı aıla-tásil qoldanýdy pysyqtaıtyn bolamyz.
— Al Nurbek qazaq boksshylarynan erler arasynda ózi ǵana qalǵanyn qalaı sezinip, qalaı qabyldap jatyr?
— Nurbek barlyq úmit ózinde ǵana qalǵanyn jaqsy biledi. Endi, ol biraz jigitterdiń ketken esesin qaıtarady dep oılaımyn. Qazaq boksshylarynyń namysy tek Nurbek Oralbaıda qaldy. Basqa eshkim qalmady. Bul Nurbekke eń úlken syn. Endi ol sheshýshi synda jan baryn salýy kerek. Ol sońǵy múmkindikti ýysynan shyǵarýǵa qaqysy joq. Endigi úmit tek Nurbekte.
— Áńgimeńizge rahmet!