Endi júrgizýshi kýáligin alý úshin emtıhanǵa tek «HQKO» qosymshasynan jazylý kerek
«Azamattarǵa arnalǵan úkimet» memlekettik korporatsııasy bul jańashyldyq azamattarǵa yńǵaıy bolý úshin jáne sybaılas jemqorlyq táýekelderin azaıtýǵa baǵyttalǵanyn habarlady.
Qaýipsizdikti qamtamasyz etý maqsatynda «HQKO» qosymshasynyń barlyq qoldanýshysy eki faktorly aýtentıfıkatsııadan ótedi: aldymen – bıometrııalyq ıdentıfıkatsııa, sosyn 1414 nómirinen kelip túsken SMS-kody arqyly óziniń jeke basyn rastaıdy. Odan keıin júrgizýshi kýáligine úmitker «Teorııalyq emtıhanǵa jazylý» nemese «Tájirıbelik emtıhanǵa jazylý» batyrmasyn tańdaıdy. Qyzmet alýshyǵa 1414 nómirinen habarlama kelip túsedi.
Aıta ketý kerek, SMS habarlama Mobıldi azamattar bazasyna tirkelgen telefon nómirine jiberiledi.
- Qosymsha arqyly emtıhanǵa jazylý úshin aldyn ala mamandandyrylǵan halyqqa qyzmet kórsetý ortalyǵyna júginip, ótinim nómirin alý qajet ekenin eskertemiz. Bul servıs emtıhan ýaqyty men emtıhan tapsyrý kestesindegi ózgerister týraly paıdalanýshylarǵa habarlap otyrady. Bul aqparatty yńǵaıly túrde jáne der kezinde alý múmkindigin edáýir arttyrady, - dep habarlady mekemeniń Almaty fılıalynan.
Eske salaıyq, emtıhanǵa jazylý buryn booking.gov4c.kz saıtynda júzege asyrylatyn. Alaıda «HQKO» mobıldi qosymshasy arqyly qyzmetti keńeıtilgen aýqymda alý úshin saıttaǵy brondaý fýnktsııasy óshiriledi. Degenmen saıt qoldanýshylary emtıhan tapsyrý sátiniń translıatsııasyn onlaın rejımde baıaǵysha kóre alady.
Atalǵan qosymsha HQKO-ǵa barý ýaqytyn brondaýǵa, elektrondy kezek úshin talon alýǵa, qyzyqtyrǵan halyqqa qyzmet kórsetý ortalyǵynyń ornalasqan mekenjaıyn tabý jáne ózekti suraqtarmen tanysýǵa múmkindik beredi.
Eske salaıyq, buǵan deıin Almatyda byltyr 4 myńnan astam adam famılııasyn ózgertkenin jazǵanbyz.