Endi úleskerlerdiń máselesin sheshýge bıýdjetten qarajat kózdelmeıdi – elorda ákimi

<p>ASTANA. KAZINFORM &ndash; Elorda ákimdigi qurylys kompanııalardyń jaýapkershiligin arttyrý maqsatynda úleskerlerdiń problemasyn sheshýge bıýdjetten qarjy bólýdi toqtatady.</p>

- Siz avto ortalyqtan kólik satyp alyp, ol sapasyz bolsa, máseleni ákimdik sheshpeıdi ǵoı. Bul da sondaı másele. Biraq, biz úleskerlerdiń jaǵdaıyn túsinip otyrmyz, 16 myń otbasy problemaǵa tap boldy. Sondyqtan Úkimet beıjaı qaramaı úlesin qosyp otyr, bıýdjetten kóptegen qarjy jumsaldy, ol - qaıtarylmaıtyn qarajat. Qurylys kompanııalary joq, olardyń ıeleri sottyń sheshimimen otyr, al úleskerlerdiń qosymsha qarajat tóleýge múmkindigi joq. Sondyqtan aldyn ala aıtyp otyrmyn, kelesi jyldan bastap «Elorda qurylys» kompanııasy taratylady, - dedi elorda ákimi Jeńis Qasymbek qalanyń áleýmettik-ekonomıkalyq damýy týraly esep bere turyp.

Shahar basshysynyń aıtýynsha, atalǵan qurylys kompanııasy kelesi jyly osy kúnge deıin bitpegen jumysty aıaǵyna jetkizedi. 

- Biz túsinemiz, osymen úleskerlerdiń problemasy bitpeıdi, báribir bireý aldanady. Qurylys kompanııalary da naryq talabyna shydamaı tarap ketedi, odan bólek alaıaqtar da bar. Olarmen jeke jumys isteıtin bolamyz, biraq bıýdjetten qarajat kózdelmeıdi, - dep túsindirdi elorda ákimi. 

Osylaısha qurylys kompanııalardyń jaýapkershiligin arttyryp, talapty kúsheıtpek. 

Aıta keteıik, Jeńis Qasymbek kelesi jyly «Elorda qurylys» kompanııasynyń taratylatynyn málim etken edi.