Endi ıesi bar ıt qapsa qylmystyq jaza qoldanylýy múmkin – ІІM
Búgin Májilistiń Ekologııa máseleleri jáne tabıǵat paıdalaný komıteti «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna ózgerister men tolyqtyrýlar engizý máselelerine arnalǵan dóńgelek ústel ótti.
«Bizdiń basty maqsat – adam qaýipsizdigin qamtý. Buralqy ıtter máselesine kelsek, oǵan jaýapty quzyrly jáne jergilikti atqarýshy organdar bar, degenmen zań aıasynda ishki ister organdary birlesip jumys isteımiz. Onyń ishinde úı janýarlaryna jaýapkershilikpen qaraý jáne olardy serýendetý tártibi baǵytynda. Úı janýarlaryn serýendetý tártibin buzǵan 6 myńnan astam adam jaýapqa tartyldy. Osy oraıda quzyrly organdardyń nazaryna eger ıesi serýendeý tártibin qaıta buzǵan jaǵdaıda úı janýaryn múlik sekildi alyp qoıý máselesin usynǵymyz keledi. Mysaly, ıesi qoǵamdyq orynda úı janýaryn tumyldyryqsyz serýendetip júredi, bul qoǵamdyq orynda adamdarǵa qaýip tóndirýi múmkin», - dedi Álisher Jarmaǵambetov dóńgelek ústel barysynda.
Osylaısha ІІM ókili úı janýaryn serýendetý tártibin qaıta-qaıta buzatyn azamattardan ony tárkileýdi usynyp otyr. Odan ári janýardyń taǵdyryn quzyrly organ sheshýi tıis.
«Janýarlarǵa jaýapkershilikpen qaraý máselesine qatysty, bizge qylmystyq jaýapkershilik qarastyrý jaǵy usynyldy. Atap aıtqanda, ıesi bar ıt bireýdi qaýyp, denesine zalal keltirgen jaǵdaıda ıesin qylmystyq jaýapqa tartý týraly. Biz aldymen adam ómiriniń qaýipsizdigin qamtamasyz etýimiz tıis», - deıdi ol.
Aıta ketsek, byltyr el aýmaǵynda 247 myń qańǵybas ıt aýlandy jáne olardy zararsyzdandyrýǵa, vaktsınalaýǵa jáne tirkeýge shamamen 20 mlrd teńge qajet.