Endi Mańǵystaý oblysynyń Beıneý aýdanynda 16 bala tamaqtan ýlandy

<p>AQTAÝ. KAZINFORM — Oqıǵa keshe 12 qyrkúıek kúni bolǵan. Saǵat 18:34 shamasynda Mańǵystaý oblysy Beıneý aýdany Beıneý aýylyndaǵy Jumaǵalı Qaldyǵaraev atyndaǵy jalpy orta mekteptiń 16 oqýshysynyń ishi aýyryp, aýdandyq jedel járdem bólimshesine júgingen. </p>

— Qabyldaý bóliminde balalarǵa oraldy regıdratatsııa jáne ınfýzıondy terapııa jasaldy. Saǵat 21:43–tegi jaǵdaı boıynsha 16 bala úıine qaıtaryldy. Oqýshylardyń densaýlyǵy birqalypty. Búgin barlyǵy mektepke bardy, — dep jazylǵan oblystyq densaýlyq saqtaý basqarmasy taratqan habarlamada. 

Sondaı-aq, aýdandyq sanıtarlyq-epıdemıologııalyq basqarmasynyń mamanadary mekteptegi astan, aýyz sýdan synama alyp, saraptamaǵa jibergen. 

Eske salaıyq, 6 qyrkúıekte Mańǵystaýdyń Munaıly aýdany Besshoqy aýylynda bir mekteptiń 500-ge jýyq oqýshysy astan ýlanyp qaldy.

Olardyń barlyǵy mektep ashanasynda tegin ystyq tamaq ishkennen keıin aýyrǵan.

Osy oqıǵadan keıin búkil el boıynsha mektepterdiń ashanasy tekseriletin boldy.

Oqý-aǵartý mınıstri Ǵanı Beısenbaev Mańǵystaýda balalardyń tamaqtan ýlanýyna jol bergender jazalanatynyn habarlady.