Eńbekpen qamtý salasynda tıimsiz jumyspen qamtý saqtalyp otyr
Búgin QR Parlamenti Senatynda bıznestiń áleýmettik jaýapkershiligi máselelerine arnalǵan júzdesý barysynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.
«Elbasynyń júktegen tapsyrmalaryna sáıkes, elimizde qolǵa alynyp jatqan bıznestiń áleýmettik jaýapkershiligi máselesinde birqatar alǵa jyljýshylyq bar. Áleýmettik jaýapkershiliktiń qazaqstandyq úlgisiniń negizgi ereksheligi memlekettik jáne azamattyq qoǵamdastyqtyń ózara baılanysy boıynsha áleýmettik problemalardy sheshý bolyp tabylady. Jalpy, bıznesti júrgizýdegi jınaqtalǵan tájirıbe áli de jete mánin ashýdy talap etedi. Osy rette áleýmettik eńbek qatynastary boıynsha oryn alǵan problemalardy ońtaıly sheshý de ózekti. Bul mindetterdiń barshasy bizdiń elimizdiń áleýmettik-ekonomıkalyq jańǵyrtý mindetterine jatady», - dedi G. Ábdiqalyqova.
Sonymen qatar mınıstr atalǵan baǵyttaǵy qordalanǵan problemalarǵa da toqtalyp ótti. «Birinshiden, búgingi kúni eńbekpen qamtý salasynda tıimsiz jumyspen qamtý saqtalyp otyr. Eńbek resýrstarynyń sapasy tómen. Eńbek naryǵynda balanstyń úılesimsizdigi de baıqalady. Bundaı problemalardyń barlyǵy eńbek ónimdiliginiń tym baıaý ósimine sebep bola alady. Óz kezeginde bul qubylys uzaqmerzimdi ekonomıkalyq ósimge kedergi keltiredi. Osyǵan oraı, atalǵan olqylyqty joıýda Údemeli ındýstrııalyq-ınnovatsııalyq damý baǵdarlamasynyń alatyn orny erekshe», - dedi G. Ábdiqalyqova.