Eńbekmın jumys berýshilerde saqtandyrý shartynyń bar-joǵyn jappaı tekseredi – feık

ASTANA. QazAqparat - Áleýmettik jeliler men messenjerlerde 22 mamyrdan bastap jumys berýshilerdiń eńbek shartyn Enbek.kz portalynda tirkeýi jáne qyzmetkerlerdi jazataıym oqıǵalardan saqtandyrý shartynyń bar-joǵyn tekseredi degen habar tarady. Eńbek mınıstrligi bul aqparatty joqqa shyǵardy, dep habarlaıdy QazAqparat.

Bul rette Eńbek kodeksi 23-baby 2-tarmaǵynyń 15-tarmaqshasyna sáıkes jumys berýshi qyzmetkerdi eńbek mindetterin atqarý kezinde jazataıym oqıǵalardan saqtandyrýǵa mindetti.

Búgingi tańda mundaı sharttardy zańdy tulǵalardyń jalpy sanynyń 32,5% ǵana jasaǵan.

Ákimshilik quqyq buzý týraly kodeksiniń 230-babyna sáıkes mindetti saqtandyrý shartyn jasaspaý shaǵyn kásipkerlik sýbektilerine – 160 AEK (552 myń teńge), orta kásipkerlik sýbektilerine – 400 AEK (1 mln 380 myń teńge), iri kásipkerlik sýbektilerine – 1000 AEK (3 mln 450 myń teńge) mólsherinde aıyppul salýǵa ákep soǵady.

Azamattardyń eńbek quqyqtaryn qorǵaý maqsatynda «Qazaqstan Respýblıkasy eńbek zańnamasy saqtalýynyń táýekel dárejesin baǵalaý ólshemsharttary men tekserý paraqtaryn bekitý týraly» birlesken buıryǵyna 2023 jyldyń 2 mamyrynda ózgerister engizildi.

Ózgeriske sáıkes, profılaktıkalyq tekserýge jatatyn jumys berýshilerdiń tizbesin jasaý memlekettik organdardyń aqparattyq júıesinen alynǵan derekter negizinde avtomatty rejımde júzege asyrylady.

Avtomattandyrý kemshilik jibergen josyqsyz jumys berýshilerdi anyqtaýǵa múmkindik beredi.

Bul rette óz qyzmetin zańnamaǵa sáıkes júzege asyratyn jumys berýshiler tekserýden ótpeıdi.

Qoldanystaǵy zańnamaǵa sáıkes profılaktıkalyq baqylaý aıasynda jumys berýshiniń Eńbek kodeksiniń 23-baby 2-tarmaǵynyń 15-tarmaqshasyn buzǵanyn alǵash anyqtaǵan kezde memlekettik eńbek ınspektorlary eskertý jasaıdy jáne ony joıýǵa tıisti nusqama beredi, qaıta anyqtaǵan kezde – ákimshilik aıyppul salynady.

Budan basqa, Eńbek kodeksi 23-baby 2-tarmaǵynyń 27-tarmaqshasyna sáıkes jumys berýshi qyzmetkermen eńbek shartyn jasasý jáne toqtatý, oǵan engiziletin ózgerister jáne (nemese) eńbek sharttaryn esepke alýdyń biryńǵaı júıesine tolyqtyrý týraly aqparatty eńbek jónindegi ýákiletti memlekettik organ aıqyndaǵan tártippen hr.enbek.kz arqyly ornalastyrýǵa mindetti.