Eńbekqorlyǵy men tabandylyǵy ony jeńiske jeteledi – Aleksandra Leniń anasy

<p>ALMATY. KAZINFORM &ndash; Pnevmatıkalyq vıntovkamen 10 metrge nysana kózdeýden aralas komandalyq synda Islam Sátpaev pen Aleksandra Le Parıj Olımpıadasynyń qola júldesin jeńip aldy.&nbsp;</p>

Bul – Qazaqstannyń Parıj Olımpıadasyndaǵy alǵashqy júldesi. Osyǵan oraı Kazinform tilshisi Aleksandra Leniń anasy Tatıana Kopeıkomen tildesip, mergen qyzdyń jeńisi týraly oı-pikirin bildi. 

Tatıana Kopeıko eń aldymen qazaqstandyq mergenderdi jarysqa daıyndaǵan jattyqtyrýshylarǵa alǵys aıtty. 

– Boıymdy qýanysh sezimi kernep barady. Balalar júldeni jeńip aldy. Bul – óte myqty komanda. Jeńiske jattyqtyrýshylardyń sińirgen eńbegi orasan. Olga Vıacheslavovna – óte myqty, talapshyl bapker. Ol kisige shyn júrekten alǵys aıtamyn, - dedi ol.

Aleksandra Leniń anasy qyzynyń Parıjge jaqsy daıyndyqpen baryp, jarys aldynda asa qatty ýaıymdamaǵanyn atap ótti. 

Foto: Almaty qalasy ákimdigi

– Bir sátke bolsa da daıyndyǵyn toqtatqan emes. Tipti jattyǵýyn bastamas buryn maǵan: «anashym, men jattyǵýymdy jasap, daıyndalýym kerek» dep aıtatyn. Meniń qyzym maqsatyna jetpeı tynym tappaıdy. Eńbekqorlyǵy men tabandylyǵy ony jeńiske jeteledi dep oılaımyn. Jarysqa qatysar kezde qatty ýaıymdaǵan joq, ózine senimdi boldy, - dedi ol.

Tatıana Kopeıkonyń aıtýynsha, ol Aleksandra nysana kózdeý sportyna barǵan sátten bastap Olımpıadaǵa barýdy armandaǵan.

– Aleksandra 4-5 synypta oqyp júrgende osy sport túrimen aınalysa bastady. Birinshi jarystaryna shyǵyp, úzdik nátıje kórsete bastaǵanda alǵashqy bapkerine «biz áli Olımpıadaǵa baramyz» dep aıtqanym bar. Bul armanymyz oryndaldy, - dep qýanyshyn jetkizdi Olımpıada júldegeriniń anasy.

Eske sala keteıik, buǵan deıin nysana kózdeýden Parıj Olımpıadasynda el qorjynyna alǵashqy júlde túskenin jazǵan edik. Pnevmatıkalyq vıntovkamen 10 metrge nysana kózdeýden aralas komandalyq synda Islam Sátpaev pen Aleksandra Le Olımpıadanyń qola júldesin jeńip aldy.