Eńbekke qabiletti múgedekter qandaı jumysqa ornalastyrylady

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Birjan Nurymbetov Úkimet otyrysynda múgedektigi bar adamdardy jumyspen qamtý kórsetkishterin baıandady, dep habarlaıdy QazAqparat tilshisi.

«Búginde Qazaqstanda 705 myńnan astam múgedektigi bar adam turady. Onyń ishinde 430 myńy – eńbekke qabiletti jastar, 181 myńy – zeınet jasynda jáne 94 myńy – balalar. Bıyl áleýmettik tólemderge, ońaltýdyń tehnıkalyq quraldary men qyzmettermen qamtamasyz etýge 448 mlrd teńge baǵyttaldy. Bul ótken jylmen salystyrǵanda 12 paıyzǵa artyq», - dedi mınıstr Úkimettiń búgingi otyrysynda.

Onyń aıtýynsha, eńbekke qabiletti jastaǵy múgedek jandardyń jalpy sanynan 100 myń adam nemese 23 paıyzy jumysqa tartylǵan. 2025 jylǵa qaraı bul kórsetkishti 30 protsentke deıin ulǵaıtýdy josparlanǵan.

«Eńbek» baǵdarlamasy aıasynda bıyl 13 myń múgedek jan jumysqa ornalasty, 626 adam kásipkerlik negizderine oqytyldy, 830 óteýsiz grant jáne 350 shaǵyn nesıe berildi. Qazirgi ýaqytta múgedek adamdarǵa arnalǵan kásipter atlasy daıyndalýda, múgedek adamdardy suranysqa ıe mamandyqtarǵa, onyń ishinde IT daǵdyrlary boıynsha oqytý júrgizilýde. «Damý» qorymen birlesip, múgedek adamdardyń qatysýymen iske asyrylatyn 76 bıznes jobany qoldaý sharalary bastaldy», - deıdi B. Nurymbetov.

Memlekettik organdarmen birlesip, múgedek adamdardy memlekettik qyzmetshiler qataryna tartý boıynsha da jumystar júrýde. Bıylǵy 1 qarashada olardyń sany 701 adamǵa jetti, onyń ishinde 391 adam Memlekettik basqarý akademııasynyń onlaın kýrstarynan ótken.

«Óńirlerde kásiporyndar men múgedek adamdardy jumysqa ornalastyrý boıynsha belgilengen kvotalardy oryndaý boıynsha jumys júrgizý ózekti bolyp qalýda. Búgingi tańda kásiporyndardyń 36 paıyzy zańnama talaptarynyń oryndalýyn qamtamasyz etken. Ákimderge osy máselege erekshe kóńil bólýdi suraımyz», - dedi Birjan Nurymbetov.