Eńbek jolyńdy aýyldan bastaýdyń esh kemshiligi joq – jas dáriger

ORAL. QazAqparat – Eńbek jolyńdy aýyldyq jerde bastaýdyń esh kemshiligi joq. Bul týraly Prezıdenttik jastar kadrlyq rezervine engen Oraldaǵy №5 qalalyq emhana dırektory Tımýr Ájiǵalıev málim etti, dep habarlaıdy QazAqparat tilshisi.

Jas dárigerdiń aıtýynsha, ózi Oral qalasynda týyp-ósken.

Ótken jyly otyzǵa tolǵan Tımýrdyń ákesi – dáriger, anasy – ınjener-tehnolog.

Ákesiniń izin qýǵan ol 2007 jyly mektep bitirgennen keıin dárigerlik mamandyqty tańdap, M.Ospanov atyndaǵy Batys Qazaqstan memlekettik medıtsına akademııasynyń (qazir ýnıversıtet) jalpy medıtsına fakýltetine túsken.

Aldymen bes jyl boıy oqyp, bakalavrıatty bitirgennen keıin hırýrgııa kafedrasynda taǵy eki jyl ınternatýradan ótken. Ony úzdik támamdaǵan Tımýr ýrolog bolýǵa talpynyp kórgen, biraq rezıdentýraǵa túsýge bir ǵana ball (shet el tilinen) jetpeı qaldy.

Sodan keıin Oralǵa oralǵan Tımýr Bókeı ordasy aýdanyna joldama aldy. Bókeı ordasy – oblys ortalyǵynan alty júzge jýyq shaqyrym shalǵaı jatqan aýdan.

- Men eń alys aýdanǵa barǵanyma esh ókingen joqpyn. Aýdandyq aýrýhanada eki jyl boıy hırýrg bolyp, tájirıbe jınadym. Jumys ta jetip artylatyn. Ásirese, sheshim qabyldar kezde qıyn. Janyńda aqyl-keńes alatyn tájirıbeli maman, konsılıým shaqyrýǵa múmkindik joq, tek ózińe senýge týra keledi. Bul jaýapkershilikti arttyryp, ózińdi shyńdaı túsedi eken. Sondyqtan jas mamandarǵa eńbek jolyn aýyldyq jerlerde bastaýǵa keńes berer edim, - deıdi Tımýr Ájiǵalıev.

Keıin Zelenov (qazir Báıterek) aýdanynda dáriger-hırýrg mindetin atqarǵan ol kóp uzamaı aýdandyq aýrýhana dırektorynyń medıtsınalyq kómekti uıymdastyrý jónindegi orynbasary bolyp taǵaıyndaldy.

2018 jyly oblystyq onkologııa dıspanseri dırektorynyń medıtsınalyq qyzmet sapasyn baqylaý jónindegi orynbasary bolyp aýysqan jas maman búginde №5 qalalyq emhanaǵa jetekshilik etip keledi.

Óz bilim-biligin udaıy jetildirip, kásipodaq qyzmetimen de ushtastyrǵan T.Ájiǵalıev «Jyl kóshbasshysy – 2019» oblystyq jastar syılyǵynyń «Úzdik jas dáriger» ataǵyn da jeńip aldy.

Prezıdenttik kadrlyq rezerv konkýrsyna qatysyp, 300 adamnyń ishinen jalpy reıtıngide 14-oryndy ıelengen jas dárigerdiń maqsaty da aıqyn.

«Bizdiń maqsatymyz – turǵyndarǵa sapaly medıtsınalyq kómek kórsetý. Qazirgi tańda mindetti áleýmettik medıtsınalyq saqtandyrýdy tabysty engizip, adamdar medıtsınalyq kómekke qoly jetetinin sezinetindeı, joǵary talapqa saı qyzmet atqara bilýimiz kerek», - dedi jas basshy.

Eske sala keteıik, budan buryn kadr rezervine engen jastardyń óz qarym-qabiletin kórsete alatynyn jazǵan bolatynbyz.