«Eńbek joly» konkýrsynyń óńirlik jeńimpazdary anyqtaldy

NUR-SULTAN. QazAqparat - Qazaqstan óńirlerinde «Eńbek joly» konkýrsynyń birinshi kezeńi ótip, onlaın-daýys berý jolymen «Úzdik eńbek áýleti», «Óndiristiń úzdik jas mamany», «Jumys isteıtin jastardyń úzdik tálimgeri» nomınatsııalary boıynsha jeńimpazdar anyqtaldy, dep habarlaıdy QazAqparat.

QR Eńbek jáne halyqty áleýmettik qorǵaý mınıstrliginiń aqparatyna sáıkes, onlaın-daýys berýdiń nátıjeleri boıynsha eń kóp upaı jınaǵandardyń úshtigi «Eńbek joly» konkýrsynyń respýblıkalyq kezeńine qatysady.

Jergilikti atqarýshy organdardyń málimetinshe, konkýrstyń óńirlik kezeńine qatysýǵa 388 ótinim berilgen, onyń ishinde 90 ótinim - «Úzdik eńbek áýleti», 154 ótinim - «Óndiristiń úzdik jas mamany» jáne 144 ótinim «Jumys isteıtin jastardyń úzdik tálimgeri» atalymdary boıynsha.

Bıyl úmitkerlerdiń sany ótken jylmen salystyrǵanda 58,4% kóp (2018 jyly 245 ótinim).

«Konkýrstyń negizgi maqsaty eńbek adamdary jóninde jaǵymdy qoǵamdyq pikir qalyptastyrý jáne kásiporyndar men uıymdarda jańa eńbek áýletteriniń qurylýyna jaǵdaı jasaý bolyp tabylady. Jeńimpazdardy saltanatty marapattaý rásimi aǵymdaǵy jyldyń qarasha aıynda Qazaqstanda Eńbek kúnin merekeleýge arnalǵan «Halyqtyń ál-aýqatyn áleýmettik áriptestik arqyly jaqsartý» respýblıkalyq forýmy aıasynda ótkiziletin bolady», - dedi mınıstrlikten.

29 qyrkúıek kúni elimizde Eńbek kúni atalyp ótti. Bul merekemen qazaqstandyqtardy Memleket basshysy Qasym-Jomart Toqaev quttyqtaǵan bolatyn.