«Eńbek joly» baıqaýy: Úzdik eńbek áýletine 1 mln teńge beriledi
Mınıstrliktiń baspasóz qyzmetiniń málimetinshe, baıqaý jumysshylardy tanymal etý maqsatynda ótkiziledi jáne «Úzdik eńbek áýleti», «Óndiristiń úzdik jas qyzmetkeri», «Jumys isteıtin jastardyń úzdik tálimgeri» degen úsh nomınatsııasy bar.
Bıyl úmitkerlerden ótinim qabyldaý 1 maýsymnan bastaldy. Baıqaýdyń óńirlik kezeńine 388 adam qatysty, onyń ishinde birinshi nomınatsııa boıynsha 90, ekinshi nomınatsııa boıynsha – 154, úshinshi nomınatsııa boıynsha – 144 ótinim tústi.
Konkýrstyń respýblıkalyq kezeńinde mınıstrlik saıtynda ótkizilgen onlaın daýys berý barysynda 179 329 daýys kelip tústi, onyń ishinde: 23 351 daýys «Úzdik eńbek áýleti» nomınatsııasy boıynsha, 65 822 daýys «Óndiristiń úzdik jas qyzmetkeri» nomınatsııasy boıynsha jáne 90 156 daýys «Jumys isteýshi jastardyń úzdik tálimgeri» nomınatsııasy boıynsha daýys kelip tústi.
«Konkýrstyń fınalısterin irikteýdi QR Eńbek jáne halyqty áleýmettik qorǵaý vıtse-mınıstri Aqmádı Sarbasovtyń tóraǵalyǵymen, onlaın daýys berýdi eskere otyryp, arnaıy respýblıkalyq komıssııa júzege asyrdy. Komıssııa quramyna QR Eńbekmıni, QR UEM, QR Prezıdenti janyndaǵy «Qoǵamdyq kelisim» respýblıkalyq memlekettik mekemesi, «Atameken» UKP, QR Kásipodaqtar federatsııasy, Qazaqstan Eńbek konfederatsııasy men «Amanat» Qazaqstan kásipodaqtar Dostastyǵynyń Úılestirý keńesiniń ókilderi kirdi», delingen habarlamada.
Komıssııa otyrysynyń qorytyndysy boıynsha ár nomınatsııa boıynsha 3 fınalıst tańdaldy. Budan ári komıssııa «Áleýmettik ınnovatsııalar jalpyǵa ortaq eńbek Qoǵamyna jol» halyqaralyq forýmy sheńberinde 4 jeltoqsanda Nur-Sultanda ótetin konkýrstyń jeńimpazdaryn anyqtaý jóninde sheshim qabyldaıtyn bolady.
«Eńbek joly» baıqaýynyń tanymaldyǵy jyl saıyn artyp kele jatyr.
Konkýrsqa qatysýǵa ótinimder sany ótken jylmen salystyrǵanda 58,4% artty. Qazaqstandyqtardy kásibı jetistikterge jáne jańa eńbek áýletterin qalyptastyrýǵa yntalandyrý maqsatynda biz óz tarapymyzdan júldeli oryndar sanyn arttyrdyq. Eger ótken jyldary tek nomınatsııa úshin marapattalǵan bolsa, bıyldan 1, 2 jáne 3 oryn úshin marapattaıtyn bolamyz. Jeńimpazdarǵa 1 oryn úshin – 1 mln teńge; 2 oryn úshin – 500 myń teńge jáne 3 oryn úshin – 200 myń teńge kóleminde aqshalaı sertıfıkattar beriledi», – dedi Aqmádı Sarbasov.
Esterińizge sala keteıik, QR Eńbek jáne halyqty áleýmettik qorǵaý mınıstrligi 2016 jyldan bastap Elbasynyń Nursultan Nazarbaevtyń Jalpy Eńbek qoǵamyn qurý ıdeıasyn júzege asyrý maqsatynda eńbek áýletteri men óndiris jumysshylary arasyndaǵy respýblıkalyq «Eńbek joly» baıqaýyn ótkizip keledi. Onyń negizgi mindeti – eńbek adamdary týraly jaǵymdy qoǵamdyq pikir qalyptastyrý jáne kásiporyndar men uıymdarda jańa eńbek áýletteriniń qalyptasýyna jaǵdaı jasaý bolyp tabylady.