Eńbek jasaqtarynda jumys isteıtin jastar 130 myń teńgege deıin jalaqy alady

AQTÓBE. QazAqparat – Aqtóbe oblysynda 2 myń jas «Jasyl el» jáne «Atameken» qurylys jasaqtarynda eńbek etedi. Olardyń eńbekaqysy 120-130 myń teńge bolady, dep habarlaıdy QazAqparat tilshisi.

Aqtóbe oblystyq Tabıǵı resýrstar jáne tabıǵatty qorǵaý basqarmasy arqyly 1200 jas orman sharýashylyǵyna barady. Onda kógaldandyrý jumystaryn jasaıdy. Al 800-i abattandyrý jáne qurylys salasyna baǵyttalady.

«Bıyl jastardyń jalaqysy ósti. Byltyr 100 myń teńge alsa, bıyl 120-130 myń teńge eńbekaqy beriledi. Bul jastardyń jumysyna baılanysty beriletin jalaqy kólemi. Negizi 16-35 jas aralyǵyndaǵy jastar eńbekke aralasa alady. Mektep oqýshylary ata-anasynyń ruqsatyn alýy tıis. Jastardan jeke kýálik kóshirmese, 075 anyqtamasy men jumyssyzdyǵyn rastaıtyn qujat suralady», - dedi «Jasyl el» jastar eńbek jasaqtary jáne «Atameken» stýdentter otrıadtary qoǵamdyq birlestiginiń tóraǵasy Nurjan Shańǵytbaev.

Qazirgi kezde jastardyń alǵashqy legi eńbegin bastap ketti. Jalpy 200-den astam jas orman sharýashylyǵyndaǵy jumysqa tartyldy. Al 100-den astamy qalany abattandyrýǵa úles qosyp júr.

«Kógaldandyrý jumystaryna tartylǵan jastar qazir Maǵadjan tálimbaǵynda aǵash sýaryp, aramshóbin julady. Sonymen birge bir bóligi tasjol jıegindegi qumdy jınaý, qoqys jınaý, taldardy áketýge jumyldyrylady. Jol belgilerin de syrlaıdy», - dedi «Jasyl el» jastar eńbek jasaqtary jáne «Atameken» stýdentter otrıadtary qoǵamdyq birlestiginiń tóraǵasy Nurjan Shańǵytbaev.

«Taza qala» aktsııasy aıasynda ózen jaǵasy da tazalanady. Bul – apta saıyn atqarylatyn jumys. «Meniń ataýly aǵashym» aktsııasy kóktemde uıymdastyryldy. «Ardagerlerimizdi ardaqtaıyq» aktsııasy aıasynda zeınetkerlerge kómektesý joly qarastyrylǵan.

Aıta keteıik, tolyq emes, kópbalaly jáne áleýmettik jaǵynan az qamtylǵan otbasylarda tárbıelenip otyrǵan 100 bala kúzde elordaǵa joldama alady.