Eńbek sińirgen bapker Tursynǵalı Edilov: Martırosıan barynsha tyrysyp baqty

ASTANA. QazAqparat - Sıdneıdegi Olımpıada oıyndarynda Qazaqstannyń tórt ókilin fınalǵa shyǵarǵan QR Eńbek sińirgen bapkeri Tursynǵalı Edilov Gennadıı Golovkınniń Vanes Martırosıandy jeńýine qatysty pikir bildirdi, dep habarlaıdy QazAqparat tilshisi.

«Gennadıı Golovkın óz kúshi men myqtylyǵyn qaıta dáleldedi. Qazirgi tańda ol orta salmaqtaǵy eń qaısar jáne eń myqty boksshy. Árıne, bárimiz búgin ony óziniń myqty qarsylastarynyń biri - «Kanelomen» aıqasady dep kúttik. Biraq, dopıng daýy men Alvarestiń bokstan shettetilýine baılanysty bul jekpe-jek bolmaı qalǵany barshamyzǵa belgili. Sondyqtan, oǵan qarsylasty shuǵyl izdeý kerek boldy», - dedi ol.

Tájirıbeli bapker GGG qarsylasynyń áreketine de baǵa berdi.

«Martırosıan - Golovkınniń deńgeıindegi boksshy emes, birneshe soqqydan keıin-aq ol álsirep qaldy. Biraq ol kerek dúnıeni berýi tıis: ol sheberligi jaǵynan GGG-dan tómen ekendigin bile otyryp, GGG-men aıqasýǵa kelisti. Bári nokaýtpen aıaqtalatynyn bildi. Aıqastyń ekinshi raýndta aıaqtalatynyn kóp adam kútpedi, degenmen bul jekpe-jektiń sońǵy raýndqa deıin jalǵaspaıtynyna senimdi boldym. Martırosıannyń batyl ári ashyq áreketi tańǵaldyrdy, ózi de shabýyldaǵysy keldi. Múmkin, ol onyń qarsylasynyń orta salmaqtaǵy chempıon, uly GGG ekendigin umytyp ketken sııaqty», - dep atap ótti T.Edilov.

Sondaı-aq, ol Golovkınniń Bıllı Djo Sonders pen Saýl «Kanelo» Alvaresti jeńetinine senimdi ekendigin aıtty.

«Bul Genaǵa jaqsy jattyǵý boldy, endi biz onyń Alvares jáne Sonderspen aıqasyn kútemiz. Bul jeńis oǵan jańa serpin men senimdilik beredi. Men Genanyń barlyq chempıondyq belbeýlerdi ıemdenetinine kúmándanbaımyn. Gennadııdiń Sondersten belbeýdi alyp, «Kanelomen» jekpe-jekte barlyq belbeýlerin qorǵaıtynyn kútemiz. Sodan keıin kelesi salmaq dárejesine kóshý týraly oılanýǵa bolady», - dep atap ótti bapker.

Sondaı-aq, T.Edilov barlyq otandastaryn Golovkınniń jeńisimen quttyqtady.

Eske salaıyq, búgin GGG ulty armıan amerıkalyq boksshy Vanes Martırosıanmen aıqasyp, 38-shi jeńisine qol jetkizdi. Jekpe-jek tehnıkalyq nokaýtpen ekinshi raýndta aıaqtaldy.

«Vanes - talapty boksshy, sharshy alańda birneshe jaqsy soqqylaryn daryta aldy. Alaıda jekpe-jekti ekinshi raýndta aıaqtaýǵa qaýqarly boldym (...) Men kez kelgen qarsylasqa daıynmyn. Eger de «Kanelo» jekpe-jekke jaıyn bolsa, men de daıynmyn. Men kóp jyldar boıy chempıondyǵymdy saqtap kelemin. Meniń beldikterimdi alǵylaryń kele me? Onda jekpe-jekke shyǵyp, tyrysyp kórińizder», - dedi Golovkın.