«Eńbek» RMK mıllıardtaǵan aqshany jymqyrdy
Bas prokýratýranyń resmı ókili Oksana Loskýtovanyń aıtýynsha, atalǵan kásiporynnyń negizgi mindeti - sottalǵandardy jumyspen qamtý. Alaıda, shyn máninde, ol deldaldyq qyzmetti atqaryp keldi. «Jeke bıznes pen sotttalǵandardyń birigýi nátıjesinde túrmelerde eńbekpen qamtý deńgeıi úsh jyldyń ishinde 49 protsentten 78 protsentke jetti. Kolonııalarda 277 bıznesmen óz kásibin ashty. 57 sottalǵan jeke kásipker retinde tirkeldi. Olar jumysqa 325 basqa sottalǵandardy aldy. Óz kezeginde sottalǵandardy jumyspen qamtýǵa jáne kolonııalarda tirshilikti qamtamasyz etý úshin qurylǵan «Eńbek» mamandandyrylǵan mekemesi basqa máselelermen aınalysyp kelgen», - dedi O.Loskýtova Astanada ótken baspasóz máslıxatynda.
Onyń aıtýynsha, qyzmet babyn asyra paıdalaný, bıýdjet qarjysyn jymqyrý sııaqty zań buzýshylyqtardyń saldarynan memleketke 3 mlrd teńgeden astam zalal keldi. «Memlekettik satyp alýlar týraly jańa zańnyń qabyldanýy «Eńbek» kásiporyndaryna bıýdjet qarajatyn belsendi túrde ıgerýge múmkindik berdi. Sol kezden bastap qylmystyq atqarý júıesine kirmeıtin memlekettik organdar tapsyrysty oryndaý úshin 68,3 mlrd teńge alǵan. Kásiporynnyń málimeti boıynsha qosalqy merdigerge sol aqshanyń 25,4 mlrd teńgesi berilgen. Qalǵan qarjy óz kúshimen ıgerilgen desedi. Alaıda is júzinde sottalýshylardyń eńbegi paıdalanylmaǵan, kerisinshe, ekonomıkalyq kórsetkishter artqanymen sottalǵandardy eńbekpen qamtý kórsetkishiniń azaıýy baıqalady. Kásiporyn taýarlar men materıaldardy qoldaný kezinde óziniń negizgi qyzmetinen aýytqyp, tek deldaldyq etken. Sottalǵandyń eńbegin paıdalaný arqyly daıyn ónimdi shyǵarý úshin qajetti óndiristik qural-jabdyqtar bar. Alaıda kásiporyn 503 mln teńgege daıyn jáne jartylaı daıyn ónimderdi satyp alǵan», - dep atap kórsetti O.Loskýtova.
Prokýrorlyq tekserister kezinde «Eńbek» RMK-nyń qylmystyq atqarý júıesinen tys memleketik satyp alýlarǵa shartty túrde qatysqany da anyqtaldy. Olar bıýdjet qarajatyn bólý maqsatynda básekelestik rásimderinen aınalyp otyrǵan. Resmı málimetke sáıkes, buǵan deıin «Eńbek» RMK-nyń bes birdeı fılıal basshysy sottalǵan bolatyn. Bıyl «Eńbek-Kókshetaý» men «Eńbek-Qostanaı» basshylary para alǵany úshin ustaldy. Al «Eńbek-Semeı» fılıalyn bankrotqa deıin jetkizgen.
«Eńbek» kásiporyndary ózara esep aıyrysý kezinde bir kúndik fırmalardy paıdalanyp, olar arqyly 3 mlrd teńgeden astam aqshany kóleńkeli aınalymǵa shyǵarǵan. Tender qýǵan respýblıkalyq kásiporyn men fılıal basshylary sońǵy eki jylda jumystyń ruqsat etilgen shekti kólemin 22,7 mlrd teńgeden asyryp jiberdi. Oral qalasyndaǵy tergeý ızolıatorynyń qurylysy barysynda bıýdjet qarajatyn jymqyrý faktileri anyqtaldy. Qurylys materıaldary men qurylǵylardy aýystyrý jáne olardyń baǵasyn joǵarylatý arqyly ıgerilgen 4,5 mlrd teńgeniń 577 mln-y qoldy bolǵan. Almaty oblysy Zarechnyı aýylyndaǵy túzeý kolonııasyn qaıta jóndeý kezinde 120 mln teńge jumsalýy tıis edi. Biraq oryndalmaǵan jumys qabyldandy. Jalpy, atalǵan nysan boıynsha materıaldar men oryndalǵan jumystardyń quny 568 mln teńgege joǵarylatylǵan. Astana qalasy jáne Aqmola oblysyndaǵy kúzet mekemelerinde kúrdeli qurylystardy júrgizý barysynda bıýdjettiń 210,5 mln teńgesi jymqyryldy», - dedi O.Loskýtova.