Eńbek mınıstrliginiń saıtynda vırtýaldy konsýltant qyzmeti iske qosyldy

NUR-SULTAN. QazAqparat - Áleýmettik-eńbek salasyndaǵy memlekettik qyzmetterdi alý týraly suraqtarǵa jaýap alǵysy keletin qazaqstandyqtar úshin QR Eńbek jáne halyqty áleýmettik qorǵaý mınıstrliginiń saıtynda «Vırtýaldy konsýltant» atty jańa servıs iske qosyldy, dep habarlaıdy QazAqparat.

«Onlaın rejimde konsýltatsııa alý úshin enbek.gov.kz veb-saıtyna kirý jetkilikti, munda tómengi oń jaq buryshta konsýltanttyń belgishesi kórinedi, ony basqan kezde mınıstrliktiń qyzmetteri týraly suraqtarǵa jaýap beriledi», delingen habarlamada.

Mysaly, mázirden «jumyspen qamtý» bólimin tańdap, adamdarǵa jumyspen qamtýǵa járdemdesýdiń belsendi sharalaryna qatysýǵa joldama berý; jumys izdep júrgen adamdardy jumyssyz retinde tirkeý jáne basqa da qyzmetter boıynsha konsýltatsııa alýǵa bolady.

Osyǵan uqsas konsýltant elektrondyq eńbek bırjasynyń saıtynda jáne @enbek_bot mekenjaıy boıynsha Telegram-da qoljetimdi.

Bul qyzmetti ázirleý úshin suraqtardy neırondyq jeliler arqyly qarapaıym tilde alýǵa múmkindik beretin aldyńǵy qatarly taldaý tehnologııasy qoldanyldy.