Eńbek mınıstrliginde qaǵazbastylyqpen kúres sharalary talqylandy

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi 23 memlekettik qyzmetti avtomattandyrý jáne ońtaılandyrýǵa qatysty sharalar atqarylýda. Bul týraly atalǵan vedomstvonyń vıtse-mınıstri Narıman Muqyshev málim etti, dep habarlaıdy QazAqparat tilshisi.

«Mınıstrlik memlekettik qyzmetterdi ońtaılandyrý men avtomattandyrý boıynsha jumysty jalǵastyryp jatyr. Avtomattandyrylǵan ári elektrondyq qyzmetter saladaǵy ashyqtyqty qamtamasyz etetinin túsinemiz. Búginde 23 memlekettik qyzmetti avtomattandyrý jáne ońtaılandyrý turǵysynda 13 jol kartany oryndaý sharalary mınıstrlikke tıesili», - dedi N. Muqyshev QR Sybaılas jemqorlyqqa qarsy is-qımyl agenttigi ókilderimen birge ótken keńeste.

Osy oraıda ol vedomstvo jumysyndaǵy qaǵaz aınalymyn azaıtý sharalary iske asyrylyp jatqanyn atap ótti.

«Ońtaılandyrý jumystary barysynda qaǵazbastylyqty joıyp, qyzmetterdi tsıfrlyq, elektrondyq júıege kóshirýge umtylýdamyz. Bul rette ońtaılandyrý, avtomattandyrý qadamdaryn iske asyrýdy qajet etetin baǵyttar áli de bar. Osy baǵytta tıisti memlekettik organdarmen, Sybaılas jemqorlyqqa qarsy is-qımyl agenttigimen birlese atqaratyn jumystar eskerilgen», - dedi vıtse-mınıstr.