Eńbek mınıstrligi jumysshy mamandyqtardy dáripteýge baǵyttalǵan baıqaý ótkizip jatyr

ASTANA. QazAqparat - QR Eńbek jáne halyqty áleýmettik qorǵaý mınıstrligi (EHÁQM) «Eńbek joly» respýblıkalyq baıqaýynyń bastalǵanyn málim etti, dep habarlaıdy QazAqparat.

Mınıstrliktiń baspasóz qyzmetiniń habarlaýynsha, konkýrs aıasynda Qazaqstannyń úzdik óndiris qyzmetkerleri men eńbek áýletteri anyqtalady.

Bul konkýrs ónimdi eńbekti yntalandyrýǵa, jastar arasynda jumysshy mamandyqtardy tanymal etýge jáne jumysshy áýletteriniń kópjyldyq dástúrlerin nyǵaıtýǵa baǵyttalǵan.

Konkýrs eki kezeńnen (óńirlik jáne respýblıkalyq) turady. Qatysýshylar úsh atalym boıynsha anyqtalady: «Úzdik eńbek áýleti» – eńbek ótili eń uzaq, marapaty eń kóp áýlet tańdalady; «Óndiristiń úzdik jas mamany» – jumys ótili 5 jyldan aspaıtyn, eń belsendi jáne eńbekqor óndiris jumyskeri tańdalady; «Jumys isteıtin jastardyń úzdik tálimgeri» – jumys ótili keminde 20 jyl, joǵary tıimdi jumys isteıtin tálimger tańdalady.

Konkýrsqa kásiporyndardyń (salasyna qaramastan) barlyq qyzmetkeri qatysa alady. Jeńimpazdardy arnaıy respýblıkalyq komıssııa anyqtaıdy.

EHÁQM baıqaýǵa eńbek áýletteriniń ókilderin, sondaı-aq bastamashyl jas qyzmetkerlerdi jáne olardyń tálimgerlerin belsendi qatysýǵa shaqyrady.

«Baıqaýǵa qatysty ózge aqparatty bilý úshin Jumyspen qamtýdy úılestirý jáne áleýmettik baǵdarlamalar basqarmasyna nemese oblystardyń, Astana, Almaty jáne Shymkent qalalarynyń Eńbek ınspektsııasy jónindegi basqarmasyna, sondaı-aq QR EHÁQM Eńbek qatynastary jáne áleýmettik áriptestik basqarmasyna 8 [phone] telefony boıynsha habarlasýdy suraımyz»,-delingen habarlamada.