Eńbek mınıstrligi ótken jylǵy jumyspen qamtýdyń qorytyndysyn shyǵardy

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi 2019 jylda nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyn júzege asyrýdyń qorytyndysyn jarııalady, dep habarlaıdy QazAqparat tilshisi.

Osy oraıda Ortalyq kommýnıkatsııalar qyzmetinde QR Eńbek jáne halyqty áleýmettik qorǵaý birinshi vıtse-mınıstri Erjan Jylqybaev iske asyrylǵan jumystardy baıandady.

Onyń sózine qaraǵanda, 2019 jyldyń qorytyndysy boıynsha elimizde 424 myń jańa jumys orny qurylǵan, bul jyldyq jospardan 14 paıyzǵa joǵary. Onyń ishinde turaqty jumys oryndarynyń sany 280 myńdy nemese 66 paıyzdy qurady. Ekonomıkalyq qyzmet túrleri bólinisinde jumys oryndarynyń eń kóp sany mynadaı salalarda quryldy: kóterme jáne bólshek saýda – 44 myń, qurylys – 43 myń, aýyl, orman jáne balyq sharýashylyǵy – 39 myń.

Birinshi vıtse-mınıstr 2019 jyly «Eńbek» memlekettik baǵdarlamasyn júzege asyrý qorytyndysy týraly aıta kele, halyqty jumyspen qamtýǵa járdemdesýdiń belsendi sharalary jumyssyzdyqtyń ósýine jol bermeýge yqpal etkenin aıtty. Onyń deńgeıi 2018 jylǵy 4,9 paıyzdan 4,8 paıyzǵa deıin tómendep, sonyń ishinde jastar arasyndaǵy jumyssyzdyq deńgeıi 3,8 paıyzǵa qysqardy.

«2019 jyly memlekettik baǵdarlamany qarjylandyrýǵa 178 mlrd teńge bólindi. Jumyspen qamtýǵa járdemdesý sharalarymen 660 myń adam qamtyldy, onyń 261 myńy nemese 40 paıyzy – jumyssyzdar, 36 paıyzy – jastar, 2 paıyzy – tabysy az kópbalaly otbasylar. 2019 jyly memlekettik baǵdarlama aıasynda 449 myń adam jumysqa ornalastyryldy, onyń 383 myńy nemese 85%-y turaqty jumyspen qamtyldy», – dedi ol.

Jylqybaev memlekettik baǵdarlamanyń birinshi baǵyty jastarǵa tehnıkalyq jáne kásiptik bilim berýdi, jumyssyz azamattardyń kásiptik daǵdylary men biliktilikterin qysqa merzimdi kýrstar arqyly jetildirýdi qarastyratynyn eske saldy.

«2019 jyly 22 myń jas lıtseıler men kolledjderge tehnıkalyq jáne kásiptik bilim alýǵa qabyldandy. Memlekettik baǵdarlamaǵa qatysýshylarǵa shákirtaqy, bir rettik ystyq tamaq jáne jol júrýge qarjylaı kómek kórsetiledi. 57 myń adam (25 myń jumyssyzdar, 17 myń ózin-ózi jumyspen qamtyǵandar) qysqa merzimdi kýrstarǵa jiberildi, olardyń ishinde 50 myń adam oqýdy aıaqtady. Oqýdy bitirgenderdiń 75%-y turaqty jumysqa ornalastyrylǵanyn atap ótken jón», – dedi birinshi vıtse-mınıstr.