Eńbek mınıstrligi kórsetetin memlekettik qyzmetter qalaı baqylanady

NUR-SULTAN. QazAqparat - Oralman mártebesin berý nemese uzartý jáne Semeı ıadrolyq polıgonyndaǵy ıadrolyq synaqtardyń saldarynan zardap shekken azamattarǵa birjolǵy memlekettik aqshalaı ótemaqy tóleý jónindegi qyzmetter endi qyzmet kórsetý trekıngi júıesinde baqylanady, dep habarlaıdy QazAqparat.

«Jaqynda QR Eńbek jáne halyqty áleýmettik qorǵaý mınıstrligi osy qyzmetterdi naqty ýaqyt rejıminde kórsetý mártebesin qadaǵalaı bastady. Búgingi kúni trekıng júıesinde QR Eńbekmıni kórsetetin 18 qyzmet monıtorıngilenedi. Olardyń arasynda memlekettik bazalyq zeınetaqy tólemin taǵaıyndaý, múgedektikti nemese eńbek etý qabiletinen aıyrylý dárejesi jáne qajetti áleýmettik qorǵaý sharalaryn aıqyndaý men taǵy basqalary bar. Bul rette mınıstrliktiń qyzmetkerleri naqty ýaqyt rejıminde qyzmet kórsetýdiń barlyq kezeńderin baqylaı alady. Keshigý nemese qyzmet kórsetpeý faktileri anyqtalǵannan keıin bolashaqta osyndaı jaǵdaılarǵa jol bermeý úshin qajetti sharalar qabyldanady», - delingen atalǵan mınıstrliktiń habarlamasynda.

Esterińizge sala keteıik, QR Eńbek mınıstrligi 35 túrli qyzmettiń oryndalýyn baqylaýǵa alýdy josparlap otyr. Budan basqa, mınıstrlik qyzmetkerleri naqty ýaqyt rejıminde kelip túsken jáne óńdelgen ótinimderdiń sanyn, olardyń qanshasynyń merzimi ótkenin baqylaı alady. Aldaǵy ýaqytta bul derekter óńirlerde memlekettik qyzmet kórsetý sapasyn taldaý úshin negiz bolady.