Eńbek mınıstrligi Halyqaralyq kóshi-qon uıymymen yntymaqtasa jumys isteıdi

NUR-SULTAN. QazAqparat – Búgin QR Eńbek jáne halyqty áleýmettik qorǵaý mınıstrligi men Halyqaralyq kóshi-qon uıymy arasynda yntymaqtastyq týraly memorandýmǵa qol qoıyldy. Qujat elordada ótip jatqan «Qazaqstandaǵy kóshi-qon: Problemalar, tendentsııalar, perspektıvalar» atty respýblıkalyq dóńgelek ústel aıasynda rásimdeldi, dep habarlaıdy QazAqparat tilshisi.

«Halyqaralyq kóshi-qon uıymy Eńbek jáne halyqty áleýmettik qorǵaý mınıstrliginiń baıyrǵy ári senimdi seriktesi sanalady. Jyl saıyn biz jumystardyń birlesken jobasyna qol qoıamyz. Onyń aıasynda trenıngter, zertteýler ótkizip, kóshi-qon salasyndaǵy problemalardy sheshýge baǵyttalǵan usynystar ázirleımiz. Búgin Halyqaralyq kóshi-qon uıymynyń BUU-nyń Kóshi-qon jónindegi agenti retinde jańa mártbesin eskere otyryp, yntymaqtastyq týraly memorandýmǵa qol qoıyp otyrmyz», - dedi qujatqa qol qoıǵan QR Eńbek jáne halyqty áleýmettik qorǵaý mınıstri Birjan Nurymbetov.

Al qujatty Halyqaralyq kóshi-qon uıymy tarapynan rásimdegen HKU-nyń Ortalyq Azııa boıynsha úlestirýshisi, Qazaqstan, Qyrǵyzstan, Túrikmenstan jáne Ózbekstandaǵy mıssııasynyń basshysy Zeınal Gadjıev memorandým tek zańdyq negiz qalap qana qoımaı taraptardyń kóshi-qon salasyndaǵy yntymaqtastyqty odan ary keńeıtýge jáne nyǵaıtýǵa nıetti ekenin bildiretinin aıtty.