Eńbek mınıstrligi el azamattarynan Áleýmettik qamsyzdandyrý kodeksine usynystar jınaıdy

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi QR Áleýmettik qamsyzdandyrý kodeksiniń tujyrymdamasyn ázirleý úshin azamattardan usynystar jınaýǵa kiristi, dep habarlaıdy QazAqparat vedomstvonyń baspasóz qyzmetine silteme jasap.

Qazaqstandyqtar óz usynystaryn baılanystyń 4 arnasy, ıaǵnı elektrondyq poshta, Facebook toby, Telegram-kanal jáne WhatsApp messendjeri arqyly jibere alady.

Budan buryn habarlanǵandaı, Memleket basshysy 2020 jylǵy 1 qyrkúıektegi Qazaqstan halqyna Joldaýynda Áleýmettik qamsyzdandyrý kodeksin ázirleý jáne qabyldaý arqyly áleýmettik zańnamany shoǵyrlandyrý jumysyn bastaýdy tapsyrdy.

Qazirgi kezde respýblıka azamattaryna áleýmettik qamsyzdandyrý sharalarynyń keń spektri qamtamasyz etilgen, olar 17 zańmen jáne 100-den astam zańǵa táýeldi aktimen retteledi. Sonymen birge, áleýmettik saladaǵy tólemder mólsherin esepteý úshin ártúrli kórsetkishter: aılyq eseptik kórsetkish, kúnkóris deńgeıi, eń tómengi jalaqy jáne basqalary negizge alynady.

Áleýmettik qamsyzdandyrý salasyndaǵy zańnamany qabyldaýdy jeńil etý jáne ony sapalyq turǵydan jaqsartý maqsatynda ol biryńǵaı Kodekske biriktiriledi. Onyń tujyrymdamasy 2021 jyldyń 2-toqsanynda ázirlenedi, odan keıin sonyń negizinde Áleýmettik qamsyzdandyrý kodeksiniń ózin ázirleý bastalady.

El azamattary óz usynystaryn kelesi arnalar arqyly jibere alady:

- Facebook toby: https://www.facebook.com/groups/expert2020

- WhatsApp: [phone], https://wa.me/message/RIAPN2DTW25UP1

- telegram kanaly: https://t.me/expertsocial

- elektrondyq poshtasy: [e-mail].