Eńbek mınıstrligi bıyl oqýǵa túse almaǵan 20 myń jasqa kásiptik bilim bermek

NUR-SULTAN. QazAqparat - Bıyl Ulttyq biryǵaı testileý nátıjesinde oqýǵa túse almaı qalǵan az qamtylǵan nemese kópbalaly otbasylardan shyqqan 20 600 balaǵa kásiptik bilim beriledi. Bul týraly QR Eńbek jáne halyqty áleýmettik qorǵaý vıtse-mınıstri Serik Shapkenov aıtty, dep habarlaıdy QazAqparat tilshisi.

«Qazirgi tańda «Eńbek« baǵdarlamasyna baılanysty 176 mlrd teńge kóleminde qarjy bólinip otyr. Prezıdentimizdiń tikeleı tapsyrmasyna sáıkes, baǵdarlamaǵa qosymsha 50 mlrd teńge bólindi. Baǵdarlamanyń birinshi baǵyty oqý máselesin qamtıdy. Árıne, biz ózimizdiń azamattarymyzdy kásiptik bilimmen qamtamasyz etýimiz kerek. Búgingi kúni az qamtylǵan nemese kópbalaly otbasylardan shyqqan balalar UBT qorytyndysy boıynsha joǵary oqý ornyna túse almaı qalsa, biz olarǵa kásibı bilim berý maqsatynda tehnıkalyq jáne kásiptik bilim beretin bolamyz. 1 qyrkúıekten bastap iske asady. 20 600 adam qabyldady», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, baǵdarlamanyń kelesi baǵyty qysqa merzimdi oqytýdy kózdeıdi. Bul rette 3-6 aı aralyǵynda azamattarǵa kásiptik bilim beriledi. Qazirgi ýaqytta 11 myń azamat oqýǵa jiberilgen. Olardyń 700-i oqýyn bitirse, 200-den astam turaqty jumys ornyna ornalasqan. Aıta keterligi, kásiptik bilim alyp shyqqan bul azamattardyń barlyǵy mindetti túrde jumyspen qamtylatyn bolady.

«Baǵdarlamanyń kelesi baǵyty - shaǵyn nesıe nemese granttar. Osy oraıda aıta keterligi, shaǵyn nesıe men granttardy alatyn azamattarymyzdy «Bıznes bastaý« baǵdarlamasy boıynsha oqytamyz. Bıyl 30 myń adamdy oqytý josparlanǵan edi. Búginde 23 myń adam oqydy. Onyń ishinde 18 myń adam óz bıznes josparlaryn qorǵap shyqty. 7 myńǵa jýyq adam shaǵyn nesıelerin aldy. Shaǵyn nesıe alǵan 5 800 adam 6200 turaqty jumys ornyn ashty. 17 200 grant berildi. Negizgi josparymyz - 23 600. Bul jumys jyl boıy ary qaraı jalǵasa beredi jáne turaqty baqylaýymyzda ustaımyz», - dedi vıtse-mınıstr.