Eńbek mınıstri múgedekterdi ońaltýmen máselesin jeke baqylaýyna aldy

NUR-SULTAN. QazAqparat - 2021 jylǵa qaraı múgedekterdi tehnıkalyq quraldarmen qamtamasyz etý 70 paıyzǵa deıin artady. Bul jaıynda búgin QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi vedomstvo baspasóz qyzmetine silteme jasap.

Mınıstr bıyl mamyrda 2025 jylǵa deıin múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi jańa ulttyq jospar qabyldanǵanyn eske saldy.

«Bizdiń búgingi basty mindetimiz – bul barlyq deńgeıdegi Ulttyq jospardyń sharalaryn sapaly iske asyrý, múgedektigi bar adamdardy tehnıkalyq quraldarmen jáne ońaltý qyzmetterimen qamtamasyz etý. Olardyń ómir súrý sapasyn arttyrýdy, táýelsizdikke qol jetkizýdi, áleýmettik, kásibı qabiletterin saqtaýdy jáne ómirdiń barlyq aspektilerine qosýdy qamtamasyz etý qajet» - dedi Birjan Nurymbetov.

Bul rette ol birinshi jartyjyldyqtyń qorytyndysy boıynsha tehnıkalyq quraldarmen jáne ońaltý qyzmetterimen qamtamasyz etilýi muqtajdardyń jalpy sany 421,1 myń múgedek bolǵanda, barlyǵy 34,8 paıyzdy quraıtynyn atap ótti.

«Qamtamasyz etýdiń eń tómen kórsetkishteri Shymkent qalasynda bar-joǵy 13; Soltústik Qazaqstan oblysynda – shamamen 24; Qaraǵandy oblysynda – 26; Qostanaı oblysynda – 28 paıyz. Múgedektigi bar adamdardy áleýmettendirý deńgeıin arttyrý, tehnıkalyq quraldarmen jáne ońaltý qyzmetterimen qamtamasyz etý úshin 2020-2022 jyldarǵa respýblıkalyq bıýdjetten 58,1 mlrd teńge bólindi. Jergilikti atqarýshy organdar ońaltýdyń tehnıkalyq quraldarymen qamtamasyz etý boıynsha bıýdjet qarajatyn tıimdi josparlaýdy jáne ıgerýdi qamtamasyz etýdi, ońaltýdyń jeke baǵdarlamalarynyń oryndalýy boıynsha baqylaýdy kúsheıtýi qajet. Biz múgedektigi bar adamdardyń quqyqtaryna qysym jasaýǵa jol bermeýimiz qajet. Olardy qoǵam ómirine tolyqqandy ıntegratsııalaý úshin qajetti quraldarmen jáne ońaltý qyzmetterimen qamtamasyz etý mindetin sheshýimiz kerek. Mınıstrlik osy másele boıynsha óńirlerdiń esepterin turaqty negizde tyńdaıtyn bolady», - dedi Nurymbetov.

Onyń atap ótýinshe, múgedekterdi qajetti quraldarmen qamtamasyz etýdi jaqsartý úshin búgingi kúni Áleýmettik qyzmetter portalyn kezeń-kezeńimen engizý júrgizilip jatyr. Aqtóbe qalasynda iske asyrylǵan ilki jobaǵa 3 medıtsınalyq-áleýmettik mekeme qosylǵan. Іlki joba nátıjesi boıynsha portal basqa óńirlerde kezeń-kezeńimen engiziledi. Bul 2021 jylǵa qaraı tehnıkalyq quraldarmen qamtamasyz etýdi 70%-ǵa deıin arttyrýǵa múmkindik beredi.

Sondaı-aq, mınıstr ásirese aýyldyq jerlerde ońaltý ortalyqtarynyń jetispeýshiligin atap ótti. Búgingi kúni 11 óńirde (Atyraý, ShQO, Jambyl, Qaraǵandy, Qostanaı, Qyzylorda, Mańǵystaý, SQO, Pavlodar, Túrkistan oblystary jáne Almaty q.) qarttar men múgedekterge arnalǵan 25 ońaltý ortalyǵy jumys isteıdi, onyń ishinde 14-i múgedek balalarǵa arnalǵan.

«6 óńirde (Aqmola, Aqtóbe, Almaty, BQO jáne Nur-Sultan, Shymkent qalalary) ońaltý ortalyqtary joq. Osy óńirlerde turatyn múgedekter áleýmettik ońaltýdyń tıisti sharalar ala almaıdy. Múgedektigi bar adamdardy ońaltý qyzmetterimen qamtý, qoǵamǵa áleýmettendirý maqsatynda óńirlerge olardyń tikeleı turatyn jerlerine múmkindiginshe jaqyn jerlerde múgedekter úshin qol jetimdiligin eskere otyryp, ońaltý ortalyqtaryn salýdy josparlaý qajet», - dedi mınıstr.

Sondaı-aq qoldanystaǵy ońaltý ortalyqtaryn zamanaýı jabdyqpen qamtamasyz etý qajettigin basa aıtty.