Eńbek mınıstri kópbalaly analardyń talabyna qatysty pikir bildirdi

NUR-SULTAN. QazAqparat - QR Eńbek jáne halyqty áleýmettik qorǵaý mınıstri Berdibek Saparbaev jaqynda kópbalaly analardyń qatysýymen ótken kezdesýge qatysty pikir bildirdi, dep habarlaıdy QazAqparat tilshisi.

«Analar kótergen eń basty másele - ol baspana. Birinshiden, olar kezekten tys baspana bergendi talap etýde. Ekinshiden, bastapqy jarnasyz, nesıesiz bolǵanyn alǵa tartýda. Alaıda, bulaı bolmaıdy, barlyǵy zańdy negizde iske asyrylýy kerek. Bizde qarapaıym azamattar kezekte tur. ıAǵnı osy adamdarǵa páter bermeı, kezekte turmaǵan bul áıelderge beremiz be?» - dedi Berdibek Saparbaev Parlament Májilisinde tilshilerdiń saýalyna jaýap bere otyryp.

Mınıstrdiń aıtýynsha, búginde Qazaqstanda 31 myń kópbalaly otbasy bar.

«Úkimet úsh jyldyń ishinde olardy pátermen qamtamasyz etý mindettemesin ózine aldy. Al jaǵdaıy óte qıyn jáne baspanasy joq áıelderdiń máselesine toqtalsaq, biz olarmen jumys istep, demeýshilerdi tartyp jatyrmyz», - dedi B. Saparbaev.

Sonymen qatar, mınıstr ereýilge shyqqan kópbalaly analardyń arasynda jumysqa ornalastyrýdy suraǵandar az bolaǵynyn aıtty.

«Ókinishke qaraı, jumysqa ornalastyrýdy suraǵandar az boldy. Bul óz kezeginde bizdi alańdatyp otyr. Eger de olar jumys surasa, onda bul basqa másele. Biz olardyń mamandyǵy bolmasa da jumys usynyp jatyrmyz. «Eńbek» baǵdarlamasy aıasynda memleket esebinen oqytý múmkindigi bar. Osy oraıda mamandyqqa oqytyp, keıinnen jumysqa ornalasýǵa kómektesemiz nemese memleket esebinen óteýsiz grant beremiz», - dedi vedomstvo basshysy.