Eńbek mınıstri áıelderdiń zeınetke erte shyǵýyna qatysty pikir bildirdi

ASTANA. QazAqparat – Búgin Senattyń jalpy otyrysynda depýtattar Eńbek jáne halyqty áleýmettik qorǵaý mınıstrinen Tamara Dúısenovadan áıelderdiń zeınetke shyǵý jasyn tómendetýge qatysty suraq qoıdy, dep habarlaıdy QazAqparat tilshisi.

«Prezıdent Qazaqstan halqyna Joldaýynda zeınetaqy júıesiniń tıimdiligin arttyrý boıynsha jańa sharalar paketin usyndy. Onyń biri – 2028 jylǵa deıin áıelderdiń zeınet jasyn 61 jasqa deıin kóterýdi toqtata turý. Bul qadam Áleýmettik kodekste kórinis tapty.

Koronavırýs pandemııasynyń azamattarymyzdyń densaýlyǵy men ómir súrý uzaqtyǵyna teris áserin eskerip, osy shara qabyldanǵany belgili. 2029 jyldan bastap zeınet jasyn ulǵaıtý josparlanyp otyr ma? Eger osylaı bolsa, qandaı jaǵdaıda erte zeınetke shyǵýǵa bolady. 58 jastaǵy áıelderdiń zeınetke shyǵýy týraly normany qaıtarý qarastyryla ma?», - dep surady senator Janbolat Jórgenbaev palatanyń jalpy otyrysynda Áleýmettik kodeks jobasyn talqylaý kezinde.

Óz kezeginde Eńbek jáne halyqty áleýmettik qorǵaý mınıstri Tamara Dúısenova keler jyldary densaýlyq saqtaý salasyna qatysty aýqymdy joba iske asyrylatynyn aıtty.

«Shynmen de, pandemııaǵa baılanysty azamattarymyzdyń densaýlyǵy, ómir súrý uzaqtyǵyna baılanysty (zańǵa) ózgerister engizildi. Oǵan sáıkes, áleýmettik qamsyzdandyrý júıesine de ózgerister bar. Memleket basshysynyń tapsyrmasyna sáıkes, bıyl qańtardan bastap zeınet jasy 61 jas dep toqtady. Aldaǵy 5 jylda densaýlyq saqtaý salasynda úlken ulttyq joba júrgizilgeli jatyr. Onyń negizgi maqsaty – aýyldarda medıtsınany jaqsartý, kópsalaly aýrýhanalardy kóbeıtý, ıaǵnı mamandandyrylǵan medıtsınalyq kómekti azamattarǵa jetkizý, telemedıtsına, erte skrınıng sııaqty máselelerdi qarastyrý. Osy jumystardyń nátıjesinde adamdardyń ómir súrý jasy uzarsa, onda 2029 jyldan keıin qaıta qaralady», - dedi mınıstr.

Sonymen qatar ol elimizdegi bul jaǵdaı dál osylaı qalsa nemese kerisinshe nasharlasa, onda zeınetke shyǵý jasy qaıta qaralatynyn jetkizdi.

«Jalpy, zeınetke erte shyǵý máselesi qoldanystaǵy zańda bar. Eger ananyń 5 balasy bolsa, ol 53 jasta zeınetke shyǵa alady. Semeı ıadrolyq polıgony aımaǵynda turǵan azamattarǵa qatysty normalar eskerilgen. Budan bólek, zeınetaqy qorlarynda zeınetaqy aktıvi bolsa, 55 jasynda zeınetaqy annýıteti arqyly shyǵý qarastyrylǵan. Sondaı-aq Memleket basshysynyń tapsyrmasy boıynsha aýyr jumys isteıten azamattardyń zeınet jasyn, zeınetaqysyn qarastyrý jónindegi máselesin tıisti jumys toby atqaryp jatyr. Jaqynda bul jóninde tujyrymdamamyzdy beremiz», - dedi vedomstvo basshysy.