Eńbek kúshi tapshy óńirge qonys aýdarǵan azamattar jumysqa ornalasyp, baspanaly bolady

ASTANA. QazAqparat – Eńbek kúshi tapshy óńirlerge qonys aýdarǵan azamattar jumysqa ornalasyp, baspanaly bolady. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

Tamara Dúısenovanyń atap ótýinshe, «Ashyq Qazaqstan 500+» atty kóshi-qon saıasatynyń jańa tujyrymdamasynyń jetinshi baǵyty eńbek kúshiniń tapshylyǵy bar óńirlerge ishki utqyrlyqty yntalandyrýdy kózdeıdi.

«Ol úshin azamattardy kóship barǵan jerinde jumyspen qamtamasyz etý jáne olardyń baspanaly bolýyna múmkindik jasaý kerek. Jumys oryndaryn ashý birneshe baǵyt boıynsha uıymdastyrylady. Birinshi – jergilikti jumys berýshilerdiń esebinen jańa jumys oryndaryn qurý, ekinshi – soltústik óńirlerge elimizdiń basqa aýmaqtarynda tabysty iske asyrylǵan jobalardy, sondaı-aq Jambyl oblysynyń aýyl sharýashylyǵy kooperatsııasyn damytý tájirıbesin transfertteý jáne onyń aýqymyn keńeıtý, úshinshi – qandastar men qonys aýdarýshylardy granttardy bere otyryp oqytýdy uıymdastyrý, keıin olardyń jumysqa ornalasýyna járdemdesý», - dedi ol.

Al baspana máselesin sheshý úshin mınıstr turǵyn úı qunynyń 50 paıyzy mólsherindegi shyǵyndy óteýge múmkindik beretin ekonomıkalyq utqyrlyq sertıfıkatyn tapsyrý kózdelip otyrǵanyn aıtady.