Eńbek kúni: 30 jylǵa jýyq kitaphanashy bolyp kele jatqan Raqııa Ýalhanovanyń jastarǵa bereri mol

<p>2013 jyly Qazaqstanda Eńbek kúni belgilendi. Ony qyrkúıek aıynyń sońǵy jeksenbisinde atap ótedi. Bıyl osy mereke 24 qyrkúıekke kelip tur. Osyǵan oraı A.S.Pýshkın atyndaǵy Shyǵys Qazaqstan oblystyq kitaphanasynyń qyzmetkeri, kitaphanashy Raqııa Ýalhanova týraly sóz etpekpiz. Tájirıbeli mamannyń jastarǵa bereri mol, dep habarlaıdy <a href="https://kaz.inform.kz/" target="_blank" rel="noopener">QazAqparat </a>tilshisi.</p>

Raqııa Ýalhanova kitaphanashy bolsa da negizgi mamandyǵy – fızık.

«Mektep bitirgennen keıin Óskemendegi jergilikti pedagogıkalyq ınstıtýttyń fızıka jáne matematıka fakýltetine oqýǵa túsip, sony aıaqtadym. Bul kezdeısoq emes, óıtkeni otbasymyzda toǵyz bala joǵary bilim alyp, negizinen muǵalim mamandyǵyn tańdap, mektepterde jumys istegen. Olardyń biri mektep dırektory, aýyldyq okrýg ákimi boldy», - deıdi ol.

Keıipkerimizdiń ákesi Nuraly aqsaqal ómir boıy Katonqaraǵaı aýdanynyń Topqaıyń aýylynda muǵalim bolyp jumys istegen jáne muǵalimder áýletiniń otaǵasy bolǵan.

«Instıtýttan keıin aýyl mektebinde mamandyǵym boıynsha jumys istedim. Keıin turǵylyqty jerimniń ózgerýine, otbasyn qurýyma baılanysty Katonqaraǵaı memlekettik muraǵatyna jumysqa ornalasyp, onda 1983 jyldan 1997 jylǵa deıin dırektor boldym. Osydan soń Óskemenge kóship, sodan beri A. S. Pýshkın atyndaǵy kitaphanada eńbek etip kelemin», - deıdi Raqııa Ýalhanova.

Onyń aıtýynsha, ártúrli sala bolǵanymen, muraǵatshy men kitaphanashy isinde kóptegen uqsastyq bar. Olarǵa júıelik tásil, ár faktiniń, sannyń, kúnniń naqtylyǵy úshin jaýapkershilik tán.

«Óskeleń urpaqty eńbekqorlyqqa, Otanǵa degen súıispenshilikke tárbıeleýge tıispiz. Biz qazirgi bilim teńizinde olarǵa qajet aqparatty naqty berýimiz kerek. Óz kózqarasymyzdy nemese oıymyzdy tyqpalamaı, búgingi jastarǵa, ásirese balalarǵa óziniń qarym-qabiletine saı, qyzyǵýshylyǵyn týdyrǵan baǵytqa bet burýyna kómektesýimiz kerek. Olarmen bir tilde sóılese bilýimiz qajet. Al ol úshin zamanaýı tehnologııalardy meńgerýimiz kerek», - deıdi kitaphanashy.

Ol bıblıografııalyq jazbalardy engizýmen aınalysady. Sondaı-aq ShQO qalalary men aýdandaryndaǵy áriptesteriniń biliktiligin arttyrý úshin kýrstar ótkizedi. Qazirgi zamanǵy kitaphana isindegi túrli tıimdi jobalardyń avtory. Jalpy eńbek ótili 44 jyl, onyń ishinde 27 jyl «Pýshkın» kitaphanasynda qyzmet atqarǵan. Eńbegi úshin «Mádenıet salasynyń úzdigi», «Qazaqstannyń qurmetti kitaphanashysy», «Kitaphana isiniń ardageri» tósbelgilerimen marapattaldy.

«Raqııa Nuralyqyzy jastar men balalar úshin úlgi bolarlyq naǵyz óz isiniń sheberi. Jańalyqtarǵa ashyq, barlyq zamanaýı tehnologııalar men protsesterdi tez meńgerip, olardy sheber qoldana biledi. Kez-kelgen iske shyǵarmashylyqpen qaraıdy, óleń, arnaý jazady», – deıdi kitaphana dırektorynyń orynbasary Janna Sakpanova.

Ol áleýmettik jelilerdiń belsendi paıdalanýshysy. Áriptesterimen birge A.S. Pýshkın atyndaǵy kitaphananyń ımıdjin qalyptastyrý úshin jeli arqyly nasıhat júrgizedi. Óz isine berilgendigi, ózin-ózi únemi damytýy – jas mamandar úshin naǵyz úlgi!