Eńbek ınspektorlary 26 myńnan astam jumyskerdiń quqyǵyn qorǵady
11:03, 10 Qarasha 2020
NUR-SULTAN. QazAqparat - Aǵymdaǵy jylǵy 1 qarashadaǵy jaǵdaı boıynsha memlekettik eńbek ınspektorlary respýblıkanyń 983 kásipornynda 27,7 myń jumysker aldynda 3,5 mlrd teńge jalaqy boıynsha bereshek bar ekenin anyqtady. Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.
Atalǵan kásiporyndardyń basshylaryna oryndalýǵa mindetti 657 nusqama berilip, 88,7 mln. teńgeden astam somaǵa aıyppul salyndy.
Qoldanylǵan sharalardyń nátıjesinde, onyń ishinde jalaqy boıynsha bereshekti óteýdiń merzimi men kestesin qatań belgileý arqyly 26 myńnan astam jumyskerdiń quqyǵy qorǵalyp, olarǵa 3,4 mlrd teńge tólendi.
Jalpy, joǵaryda kórsetilgen kezeńde memlekettik eńbek ınspektorlary 3,4 myń tekserý júrgizdi. QR eńbek zańnamasyn buzýdyń 5,4 myńnan astam faktisi anyqtalyp, 157,7 mln teńge somaǵa aıyppul salyndy.